Author

Halldóra

Lánsöm og full þakklætis

by Halldóra september 29, 2013

Í dag eru nákvæmlega sex vikur síðan ég datt á reiðhjóli, þegar ég átti rétt innan við 1 km í mark í Gullhringnum 2013.

Ég braut 5 rifbein og viðbein sem gert var að og ég fékk mar á lunga, loftlunga að hluta og mar á höfuðið eftir að hafa fengið heilahristing, þegar ég rotaðist. Ég lá á spítalanum í 11 daga og læknarnir sögðu að ég yrði að vera frá vinnu til 1. okt. Ég varð að hætta við að taka þátt í heimsmeistarakeppninni í þríþraut í London sem ég hafði ætlað að taka þátt í sem og maraþoni í Munchen sem ég ætlaði að hlaupa með Óla (hans fyrsta maraþon).

Nú sex vikum síðar er ég einstaklega þakklát, þakklát fyrir að ekki fór verr. Þakklát fyrir að lenda ekki í þessu slysi fyrr en í lok sumars. Þakklát fyrir að hafa getað klárað Ironman í sumar, hjólað Jakobsstíginn og klárað Landvættinn.

Ég er virkilega þakklát að hafa getað mætt í vinnu innan þriggja vikna frá slysinu. Þakklát að geta hjólað aftur og hlaupið, en ég hljóp í fyrsta skipti í gær 8 km með hlaupahópnum mínum Bíddu aðeins. Fór ekki hratt, en Bibba, Sjana og Óli hlupu með mér. Svo er ég búin að hjóla um 100 km um helgina, með Óla og Ásgeiri og það á racernum sem ég var á, þegar ég datt. Auk þess er ég búin að fara í stutta göngutúra með hundana i þessu yndislega veðri.

Það eru forrréttindi að geta hreyft sig og notið náttúrunnar. Ég er líka búin að ganga á Hafnarfjall, alveg upp á topp eftir að ég datt og það var yndislegt.

Nú þarf ég bara að prófa að fara aftur á sundæfingu til að kanna hvort ég geti ekki farið að synda líka, því sundlaugarnar okkar eru þær bestu í heimi.

Lífið er yndislegt og ég var mjög heppin.

Munum öll að njóta hvers dags því lífið er fallvalt 🙂

september 29, 2013 0 comment

Daglegt líf

Takk LSH fyrir virkilega góða þjónustu

by Halldóra september 17, 2013

Tölvupóstur sendur til Björns, forstjóra LSH, mánudaginn 16.09.2013

Sæll Björn

Ég heiti Halldóra Gyða Matthíasdóttir Proppé og var lögð inn á LSH við Hringbraut deild 12 E – eftir að hafa dottið illa á reiðhjóli þann 18. ágúst sl. og brotið fimm rifbein og viðbein og fengið áverka á lunga og höfuð.

Á spítalanum var ég undir handleiðslu læknanna, Tómasar Guðbjartssonar vegna lungna og höfuðáverka og Brynjólfs Jónssonar vegna viðbeinsbrots sem þurfti að lagfæra.

Þjónustan sem ég fékk á spítalanum var algjörlega einstök, hvort sem var á slysavarðsstofunni, sem ég kom fyrst á, eða á skurðdeild og vöknun á Borgarspítala eða á deildinni minni á Hringbraut. Allt starfsfólkið sem sinnti mér, læknar, hjúkrunarfræðingar, sjúkraflutningamenn og aðrir starfsmenn voru algjörlega í sérflokki, þar sem umhyggja og þarfir sjúklingsins (mínar) voru algjörlega númer eitt.

Þegar ég lá á deildinni var mér oft hugsað til Florence Nightingale, því mér fannst hún oft komin þarna ljóslifandi. Það eru einstakir starfsmenn á spítalanum, sem sýna manni mikla alúð og umhyggju og ég var alltaf umvafinn slíku fólki á meðan ég lá þar.

Eftir útskrift fór ég í eftirskoðun hjá læknunum upp á spítala sem gekk mjög vel og þar fékk ég góðar móttökur. Báðir læknarnir hafa hringt í mig heim til að kanna líðan mína og nú síðast hringdi Tómas í mig í kvöld til að athuga hvernig ég hefði það og fara yfir verkjalyfin með mér. Þetta fór sko langt fram úr mínum væntingum.

Mig langaði bara að deila þessari upplifun og reynslu með þér Björn, því mér finnst allt of mikið um neikvæða umfjöllun í ljósvakamiðlum og öðrum fjölmiðlum um starfsemi LSH. Mín upplifun er einstaklega jákvæð og þú mátt skila kærri kveðju og þakklæti til Tómasar og Brynjólfs og allra hjúkrunarfræðinganna og sjúkraliðanna á deildinni (Florence Nightingale´s í fleirtölu)

Með kærri kveðju og miklu þakklæti.
Halldóra Gyða Matthíasdóttir Proppé
Kt: 200669-3209

p.s. ég var líka einstaklega ánægð með að hafa þráðlaust gestanet á spítalanum, takk fyrir það

september 17, 2013 0 comment

Daglegt líf

Sigga og gullið :-)

by Halldóra ágúst 18, 2013

Frábær póstur sem Einar Bárða skrifaði um Siggu vinkonu eftir Gullhringinn á FB síðu Gullhringsins.

Sigríður Sigurðardóttir er sannarlega Gullið í Gullhringnum í dag. Í lokaspretti með Halldóru Gyðu um fyrsta sætið í Gullhringnum í B flokki datt Halldóra mjög illa. Sigríður stoppaði og “afsalaði” sér þannig fyrsta sætinu en gætti vinkonu sinnar allan tímann þangað til að hún var kominn upp í sjúkrabíl. Slysin gera ekki boð á undan sér og koma sannarlega á versta tíma. Sigríður Sigurðardóttir er sannarlega kominn í Wall Of Fame í þessari keppni !

Hún Sigga mín er einstök og mér þykir ofboðslega vænt um hana.

ágúst 18, 2013 0 comment

Hjól Hlaup Keppnis Skíði Sund

KEPPNISSAGA – Landvættur #8 2013

by Halldóra ágúst 10, 2013

Fyrirmyndarhúsmóðirin lauk í dag síðustu þrautinni sem þurfti að ljúka til að geta orðið löggiltur félagi í Fjölþrautafélaginu Landvættir og er hún félagi númer 8.

Til að geta orðið Landvættur þarf að afreka eftirfarandi á innan við 12 mánuðum.

Vesturhluti:
Fossavatnsgangan, 50 km skíðaganga á Ísafirði.

Norðurhluti:
Jökulsárhlaupið, 32.7 km hlaup frá Dettifossi til Ásbyrgis.

Austurhluti:
Urriðavatnssundið, 2.5 km sund í Urriðavatni nálægt Fellabæ.

Suðurhluti:
Blue Lagoon Challenge, 60 km hjólreiðar frá Hafnarfirði.

Fyrirmyndarhúsmóðirin ákvað ásamt vinkonu sinni Kristjönu Bergsdóttur í lok síðasta árs að stefna að því að klára allar þessar þrautir og verða fyrstu félagsmenn Landvætta.

Fossavatnsgangan – 4. maí 2013
Fyrsta þrautin var Fossavatnsgangan. Fyrsta skref í þeirri þraut var að fjárfesta í gönguskíðum, en Fyrirmyndarhúsmóðirin hafði aldrei stigið á gönguskíði áður. Síðan var að skella sér á námskeið. Gönguskíðafélagið Ullur bauð upp á námskeið á gönguskíðum fyrir byrjendur í samstarfi við Olís og skelltum við okkur á það. Við vorum svo heppnar að fá góða leiðsögn Óskars Jakobssonar hlaupa- og gönguskíðagarps og Hugrúnar Hannesdóttur fjallagarps. Eftir að hafa stigið tvisvar á skíði skelltu vinkonurnar sér í Bláfjallagönguna sem gekk mjög vel og komu þær báðar heim með medalíur.

Ferðin vestur í maí gekk svo ágætlega. Það var mikið rok fyrir vestan svo þeir urðu að færa Fossavatnsgönguna upp í Seljalandsdal, svo við gengum 3 * 15 km hringi í dalnum í stað þess að ganga Fossavatnið, en reyndir menn segja Seljalandsgönguna erfiðari en Fossavatnsgönguna og því var hún stytt um þessa km. Fyrirmyndarhúsmóðirin og Kristjana voru mjög anægðar með að hafa klárað þessa fyrstu þraut í Landvættunum. (Frekari frásögn um Fossavatnsgönguna er að finna hér)
45 km skíðaganga = 4 klst 15 mín 06 sek.

Bláalónsþrautin – 8. júní 2013
Önnur þrautin var Bláalónsþrautin sem haldin var 8. júní. Fyrirmyndarhúsmóðirin hafði ekki miklar áhyggjur af henni, enda hafði hún tekið tvisvar þátt áður, einu sinni í fullri lengd og einu sinni í styttri. Hins vegar var veður frekar leiðinlegt, mikil rigning og mikil drulla. Þegar komið var til Grindavíkur voru gírarnir á hjólinu allir fastir í drullu, svo það var nánast hjólað í einum gír frá Grindavík í Bláalónið, en þar sem markmiðið var bara að klára á aðeins betri tíma en í fyrra, var Fyrirmyndarhúsmóðirin bara ánægð með daginn.
60 km hjólreiðar = 2 klst 51 mín 12 sek.

Urriðavatnssundið – 27. júlí 2013
Urriðavatnssundið varð besta grein Fyrirmyndarhúsmóðurinnar, þar sem hún kom fyrst kvenna í mark. En mikið kom það henni á óvart en þetta var í fyrsta skipti sem hún keppti í “open water” sundkeppni á Íslandi og það var kalt (að hennar mati) þó vatnið hafi verið um 16 gráður. Hún lenti í vandræðum með hægri höndina, þar sem verkir eftir Jakobsstíginn sátu ennþá í henni. En ¾ af Landvættunum komnir í hús. Frekari umfjöllun hérna:
2.500 m sund= 51 mín 25 sek.

Jökulsárhlaupið – 10. ágúst 2013
Síðasta þrautin var svo Jökulsárhlaupið. Veðurspáin í samræmi við veðurfar sumarsins, frekar kalt og rigning, en sem betur fer ekki rok svo Pollýönnurnar þökkuðu bara fyrir það. Fyrirmyndarhúsmóðirin var nú ekki til fyrirmyndar, þar sem hún kom of seint í rútuna, hafði eitthvað misskilið brottfarartíma úr Ásbyrgi í Dettifoss. En hlaupið gekk vel þrátt fyrir mikla drullu og mikla rigningu, en Fyrirmyndarhúsmóðirin naut þess að hafa frábæran héra á undan sér – meistarann og þjálfarann Ásgeir Elíasson.

Það sem toppaði ánægju þessa hlaups var að betri helmingurinn hljóp sitt fyrsta fjallahlaup í Jökulsárhlaupinu og gekk mjög vel. Helgin var yndisleg með Siggu og Pétri og Sprengju Kötu og Ásgeiri og Ívari (Ásgeir og Ívar voru bara fyrri nóttina). Frábær helgi á einum fallegasta stað landsins.
32,7 km utanvega hlaup = 3 klst 20 mín 51 sek.

Fleiri myndir frá Jökulsárhlaupinu er að finna hér:

HEILDARTÍMI Fyrirmyndarhúsmóðurinnar eða Landvætts #8 (númerin eru í þeirri röð sem Landvættir komu í mark í Jökulsárhlaupinu, hefur ekkert með heildartíma eða árangur að gera) er 11 klst 18 mín 34 sek.

Það væri áhugavert að taka saman fjölda klukkustunda sem var varið í bíl þegar ekið var vestur á Ísafjörð, austur á Egilsstaði og svo norður í Ásbyrgi En þar sem ferðafélagar voru alltaf mjög skemmtilegir þá var þetta bara yndislegur og skemmtilegur tími, sem algjör óþarfi er að taka saman

ágúst 10, 2013 0 comment

Hjól Keppnis

KEPPNISSAGA – Gullhringurinn sem endaði á LSH 2013

by Halldóra júní 18, 2013

Við Sigga vinkona ákváðum að taka þátt í hjólareiðakeppninni Gullhringnum 18. ágúst sl.

Við ákváðum að fara B hringinn sem var 66 km og þetta átti bara að vera bara fín og löng æfing, þar sem stutt var í heimsmeistaramótið í London. Þetta var í fyrsta skipti sem ég tek þátt í svona racer hjólakeppni þar sem margir eru ræstir í einu og var keppnin mjög skemmtileg.

Hópurinn hélst nokkuð þéttur til að byrja með og við sem vorum fremst vorum nokkuð dugleg að skiptast á að leiða og drafta. Þegar á leið helltist aðeins úr hópnum og þegar við vorum að hringa aðila sem voru í A hringnum þá duttu enn fleiri úr lestinni.

Þegar um 10 km voru eftir þá vorum við Sigga (einu konurnar) í hópi með nokkrum öðrum, held við höfum kannski verið 6 eða 7, því Helgi Geirharðs og Ívar ásamt þriðja manni höfðu stungið okkur af þegar við Sigga hægðum á okkur þegar ég rétti henni annan vatnsbrúsann minn. Hún hafði glatað sínum brúsa og það gekk erfiðlega að grípa vatnsglös á leiðinni, en ég var með tvo brúsa.

Þegar nokkrir km voru eftir, var greinilega komið að lokasprettinum, ég man bara að ég var farin að hugsa hversu skemmtilegt það væri að við Sigga fengjum báðar gull því við vorum í sitthvorum aldurshópnum og var farin að hugsa um í hvaða peysu ég ætti að vera í, á pallinum. Var ánægð að vera ekki í Hjólamannapeysunni minni svo hún var þurr og man ég var með Þríkó bolinn minn líka (stolt Hjólamanna og Þríkó þríþrautarkona) �

Síðan man ég ekki fyrr en ég lít upp og sé að Gunnhildur (Dunda hjá Rauða krossinum) Sveinsdóttir úr 3Ægir er að spyrja mig hvaða mánuður sé og hvaða dagur og ég vissi ekki af hverju ég lá á götunni með flísteppi yfir mér og undir mér. En mér var þá sagt að ég hefði dottið, það var búið að hringja á sjúkrabíl sem var á leiðinni og ég man að ég fékk að tala við Óla í símann og honum sagt að koma á móti mér á Selfoss.

Ég hafði greinilega rotast og mér var sagt að ég hefði margoft beðið um að fá að klára og bara viljað klára keppnina Sigga vinkona og Siggi Martins höfðu snúið við og kláruðu ekki keppnina til að sitja yfir mér með Gunnhildi. Einhver maður úr næsta húsi kom með flísteppi fyrir mig og hringdi á neyðarlínuna. Sigga sagði mér líka að hún hefði sagt mér að við værum búnar að vinna keppnina og þá fyrst hefði ég róast (það er samt ekkert keppnisskap í minni )

Ég man eftir ferðinni í sjúkrabílnum og man eftir að hafa talað um að þessi helgi var “HFF” og sjúkraflutningamennirnir skildu það ekki- en þá var ég að vísa til þess að Stjarnan hafi tapað í úrslitaleiknum deginum á undan og svo að ég skyldi detta þegar innan við 1 km var eftir af þessari keppni. “HFF” = “Helvítans Fokking Fokk” – afsakið orðbragðið – en þetta er orðtak sem einhver kom með haustið 2008.

Farið var með mig í röngtenmyndatökur á Sjúkrahúsið á Selfossi, þar hitti ég Óla. Svo var ég send með sjúkrabíl frá Selfossi á Slysó á gamla Borgarspítalann, þar voru teknar fleiri myndir og ég send í höfuðskanna. Niðurstaðan, fimm brotin rif, brotið viðbein og mar á lunga og loftlunga vinstra megin sem og mar á höfði. Ákveðið að leggja mig inn á heila- og lungnadeild LSH við Hringbraut, svo ég var send um kvöldið í sjúkrabíl þangað. Held ég hafi aldrei verið jafn oft, mikið og lengi í sjúkrabíl fyrr á æfi minni, en allir sjúkraflutningamennirnir voru mjög indælir.

Ég fór í aðgerð á viðbeini fjórum dögum síðar og lá inni á LSH við Hringbraut í 11 daga. Þar naut ég frábærrar umönnunnar einstakra heilbrigðisstarfsmanna spítalans og fékk góðar heimsóknir fjölskyldu og vina. Eftir að ég kom heim sendi ég tölvupóst á forstjóra LSH Björn Z þar sem ég þakkaði kærlega fyrir frábæra þjónustu, (sjá tölvupóstinn hérna).

Mig langar að þakka öllum sem huguðu að mér, þá sérstaklega Siggu vinkonu (sem fórnaði gullinu fyrir mig) Sigga Martins og Dundu, sem og manninum sem kom með flísteppinn. Einnig vil ég þakka öllum sjúkraflutningamönnunum, hjúkrunarfræðingunum á spítulunum öllum og læknunum kærlega fyrir einstaka umönnun og hlýju. Auk þess er ég mjög þakklát öllum vinum mínum og fjölskyldu sem heimsóttu mig á spítalann. Takk líka öll sem senduð mér kveðju á facebook. Ég er ofboðslega þakklát, glaðasti þríþrautarkappi í heimi og tel mig heppna að hafa ekki slasast verr. TAKK ÖLL

Glæsilegt myndband frá keppninni er að finna hér:

júní 18, 2013 0 comment

Keppnis Skíði

KEPPNISSAGA – Fossavatnsgangan 2013

by Halldóra maí 5, 2013

Fyrirmyndarhúsmóðirin er stolt af því að vera ein af 90 keppendum sem luku keppni í 45 km skíðagöngu á Ísafirði, Fossavatnsgöngunni 4. maí og lauk keppni í 83 sæti, á tímanum 4 klst 15 mín og 6 sek.

Gönguskíðin fékk hún í jólagjöf, fór á gönguskíðanámskeið hjá Ulli, 12. janúar og skellti sér í Bláfjallagönguna 20 km þann 16. febrúar og hefur alls farið 10 sinnum með Fossavatnsgöngunni á gönguskíði.

Þetta var í 63 skipti sem Fossavatnsgangan er haldin, en hún var haldin fyrst árið 1935.

Vegna slæmrar veðurspár var tekin ákvörðun í pastaveislunni á föstudagskvöldinu að flytja gönguna upp á Seljalandsdal svo gengnir voru þrír 15 km hringir, í stað þess að ganga að Fossavatni einn 50 km hring. Forsvarsmenn keppninnar sögðu þessa göngu erfiðari þ.e. þessa þrjá hringi en þennan eina stóra og því var keppnin stytt um 5 km.

Fyrirmyndarhúsmóðirin ók ásamt samferðarmönnum, þeim Kristjönu Bergsdóttur og Ívari Trausta Jósafatssyni á föstudagsmorgni, þannig að þau misstu af fimmtudags-dagskránni, þ.e. masterclass skíðanámskeiði sem haldið var á fimmtudagseftirmiðdeginum og jógatímum með Mörthu Erntsdóttur.

Ferðin vestur gekk mjög vel. Fyrst var farið á Hótel Ísafjörð til að sækja gögnin, síðan var útibú Íslandsbanka heimsótt og síðan farið með skíðin í lúxus áburðarþjónustu hjá Craft Sport.

Eftir það var smá tími til hvíldar áður en skíðin voru sótt aftur og farið í pastaveislu í íþróttahúsinu. Þar var haldinn kynningarfundur með þátttakendum þar sem okkur var tilkynnt um breytta staðsetningu og tímasetningu og lengd göngunnar vegna veðurs.

Að sjálfsögðu voru allir bara rólegir og í raun bara ánægðir með að ekki yrði hætt alveg við gönguna. Eftir að hafa gert allt klárt um kvöldið var áð snemma til að fá góðan svefn fyrir gönguna.

Á keppnisdag var vaknað snemma í sterkt kaffi og ristað brauð með sultu. Síðan var farið með rútu upp í Seljalandsdal. Áður en lagt var í hann, hitti Fyrirmyndarhúsmóðirin eina fremstu gönguskíðakonu í heimi, Seraina Boner, frá Sviss, sjá hér heimasíðuna hennar. Boner tók vel í beiðni húsmóðurinnar um að fá að taka mynd af sér með henni. Boner sigraði gönguskíðakeppnina í kvennaflokki á tímanum 02:17.11.

Þrátt fyrir erfiðar aðstæður rok og ofankomu, gekk gangan bara þokkalega og Fyrirmyndarhúsmóðirin ánægð með niðurstöðuna, en hún var í 10 sæti í sínum aldursflokki konur, 35-49 ára og í 19 sæti af 23 konum sem kepptu. Stærsti sigurinn er að þora að vera með þrátt fyrir að vera nýbyrjuð og þar af leiðandi fáar æfingar og aðallega byltu, sem hún fékk í æfingu á Akureyri í lok febrúar, sem er búið að kosta marga tíma hjá hnykkjara, sjúkraþjálfara og nuddara 🙂

Kaffisamsætið á eftir og Gúllassúpan og skemmtunin í Edinborgarsalnum um kvöldið voru alveg til fyrirmyndar og Ísfirðingar geta verið stoltir af þessari frábæru skíðaveislu sem Fossavatnsgangan er, Fyrirmyndarhúsmóðirin mun klárlega mæta aftur 🙂

Hér að neðan má sjá fjölda þátttakenda í hverri vegalengd fyrir sig og úrslit.

90 þáttt. = 45 km
108 þáttt. = 15 km
39 þáttt. = 10 km
63 þáttt. = 2,5 km

Ferðin heim á sunnudeginum var hins vegar mjög eftirminnileg, þar sem Steingrímsfjarðarheiðin, var illa fær. En ferðalangarnir voru á almennilegum fararskjóta og höfðu fengið upplýsingar frá veðurfræðingi hvenær best væri að fara og því var ekki lagt í hann fyrr en ljóst var að búið var að búið væri að ryðja brautina. Það var mikill skafrenningur á heiðinni, svo Ívar skellti sér í snjósleðagallann og trail strigaskóna út í snjóbylinn og hljóp á undan bílnum til að vísa leiðina, þegar hætti að sjást á milli stika. Á eftir hópnum voru fleiri bílar sem nutu leiðsagnar hlaupagarparins okkar. En með öruggum bílstjóra, góðum fararskjóta, frábæru samferðarfólki og hröðum undanfara – varð leiðin heim bara TRAUST, fróðleg og skemmtileg, enda bættist annar Trausti við hópinn fyrir heimferðina, sem hafði ætlað í flug.

—————————————————
Kristjana Bergsdóttir fékk fyrstu verðlaun í sínum aldursflokki í Íslandsgöngunni og fékk tvo bikara, farandbikar og annan til varðveislu.

Myndaalbúm frá Fossavatnsgöngunni er að finna hér:

maí 5, 2013 0 comment

Daglegt líf

Hemmi og svaraðu nú

by Halldóra apríl 7, 2013

Var í viðtali hjá Hemma Gunn í dag á Bylgjunni í þættinum ,,Hemmi og svaraðu nú”. Ég hef aldrei hitt Hemma Gunn áður í svona eigin persónu (jú hann var farastjóri á Costa Del Sol þegar ég var þar 1987 en ég talaði nú ekkert við hann þá), en hann hringdi í mig um daginn, (ég veit að Emma sem er yfirmaður á Stöð 2 sport, benti á mig) og þegar maður var búin að segja JÁ við Fréttatímann,= þá er ekki hægt að segja Nei við Hemma, enda sé ég ekki eftir því 🙂

Það var nefnilega alveg einstakt að spjalla við Hemma. Hann er svo einlægur og yndislegur og með því að vera hann sjálfur, brosandi, geislandi og glaður, nær hann algjörlega fram því besta í fólki. Hann gaf sér góðan tíma til að spjalla við mig áður en kveikt var á míkrafóninum og ná þannig úr mér mesta hrollinum. Þetta er algjörlega einstakur og frábær eiginleiki góðs útvarpsmanns, enda er Hemmi mikill reynslubolti 🙂

Hemmi er mjög áhugasamur um fólk og hans markmið er að hafa jákvæð og góð áhrif á hlustendur og hann vill að viðtölin hans hreyfi við fólki. Það er líka frábært á þessum tímum, þar sem ansi mikill tími fer nú í pólitískt þras og neikvæðni þar sem stutt er í kosningar. Eftir þetta stutta spjall okkar Hemma eignaðist ég vin fyrir lífstíð og það var eiginlega eins og við hefðum alltaf verið vinir og þekkst lengi lengi lengi, enda komumst við að því að við eigum margt sameiginlegt 🙂

Ég vona að þetta stutta spjall mitt við Hemma í dag hreyfi við einhverjum sófadýrum til að setja sér markmið og að einhverjir fari út og njóti hvers einasta dags til fullnustu – því munið að lífið er fallvalt svo við þurfum að njóta hvers dags. Við vitum ekki hvað morgundagurinn ber í skauti sér.

Hér að neðan eru viðtölin, þrír hlutar.

Hemmi og svaraðu nú – Halldóra G M P – fyrsti hluti
Hemmi og svaraðu nú – Halldóra G M P – annar hluti
Hemmi og svaraðu nú – Halldóra G M P – þriðji hluti

apríl 7, 2013 0 comment