Viðtal við Leif fararstjóra og Ólaf Má Björnsson einn af skipuleggjendum ferðarinnar.
Plan A Hjörleifshöfði: 90 km, hækkun +293 m, lækkun -854 m
Plan B Landeyjarhöfn: 71 km, hækkun +428 m, lækkun -928 m
Ákveðið var að kvöldi dags 8 að fara plan A, sem var að klára við Hjörleifshöfða.
RAUN: 95 km og 450 metra hækkun.
Við vöknuðum eins og alltaf klukkan 8, morgunmatur og svo var brottför klukkan 10:00. Við Óli sváfum í tjaldinu við hesthúsið í Hvanngili og ég svaf mun betur í nótt en síðustu nótt, þar sem það var minni rigning og því lak minna á okkur, dropaði aðeins á andlitið þegar ég fór að sofa, en svo stytti upp og ég svaf eins og engill. Hins vegar vaknaði ég aftur annan morguninn í röð, mjög bjúguð til augnanna, sem er örugglega bara þreyta eftir 8 daga hjólatúr, en ákvað að taka mynd af mér núna sem klárlega sýnir að það er álag á líkamann að hjóla svona mikið á hverjum degi í marga daga 🙂
Við vorum tilbúin til brottfarar klukkan 10:00. Bæði tjaldbúðarhópurinn sem og skálafólkið. Þar sem vetrar-fjallahjólaskórnir mínir voru orðnir mjög blautir og þungir og það áttu ekki að vera mörg vöð að vaða yfir þennan daginn, þá ákvað ég að vígja nýju Bontrager skóna mína, sem voru alveg frábærir. Sá mest eftir að hafa ekki notað þá fyrr, því þeir losa svo vel vatnið úr skónum í staðinn fyrir að halda því inni og þyngja skóinn eins og vetrarskórnir gera.
Framundan var 25 km hjól á Mælifellssandi, sem var alveg töff. Ég leiddi aftasta hópinn fyrstu 10 km og það var smá vindur á móti. Við vorum samt ótrúlega heppin með veður, því það hafði rignt mikið á sandinum í gær, svo hann var frekar þéttur og líka gott að þurfa ekki að vera að hjóla hann í rigningunni. Mælifellið er mjög fallegt og það er einstök tilfinning að hjóla á svona fallegri leið á sandinum og horfa á Mýrdalsjökul á leiðinni.
Svo tók við um 25 km kafli á mjög grýttum stíg, þar sem Leifur og Hilmar vöruðu okkur sérstaklega, þar sem það er mjög auðvelt að detta af hjólinu og lenda á stórgrjóti sem var þar allt í kring. Við vorum því beðin um að fara sérstaklega varlega á þeim hluta.
Við áðum eftir sandinn þ.e. 25 km og svo aftur eftir grýtta hlutann, þ.e. við Hólmsárfoss. Eftir það kom ágætis kafli, sem var auðveldara að hjóla en ein erfið brekka. Svo kom nokkuð þægilegur vegur að Þjóðvegi 1, en þá voru framundan 25 km á malbiki og um 5 km kafli niður að sjó, hjá Hjörleifshöfða.
Það var gott að hvíla sig aðeins fyrir malbikskaflann, taka inn orku, drekka og pumpa aðeins meira lofti í dekkinn. Hópnum var svo skipt upp í tvo hópa, hraðari og hægari og um 10 hjólarar í hvorum hóp. Ég var í hægari hópnum og þurfti Sigrún einu sinni að stoppa okkur til að samstilla hópinn, allir áttu að hjóla á hvítu línunni, en það var mikill mótvindur, þ.e. að suðvestan. Eftir stoppið gekk þetta vel, en það voru Sædís, Jónsi og Gummi sem skiptust á að leiða hópinn og Hilmar var aftast, með blikkandi ljós á bæði bakpokanum og hjólinu. Ég var búin að koma af mér bakpokanum í bílinn til Óla, sem ég var búin að bera allan daginn og auðvitað meira og minna alla níu dagana. En í honum var alltaf úlpa ,til að fara í, þegar við stoppum, auka drykkjarbrúsi með orku, nestið sem var smurt fyrir daginn, gel, súkkulaði og Haribo hlaup og flugnanetið var líka ómissandi. Svo voru yfirleitt alltaf auka peysur og buff komið í bakpokann þar sem ég fór yfirleitt allt of mikið klædd af stað 🙂
Það dugði flesta dagana að vera bara í brynjunni góðu utan yfir vind-stuttermabolinn „hjóla“ sem ég keypti á Tenerife fyrir nokkrum árum, algjör snilld.
Malbikskaflinn gekk eftir þetta eina stopp mjög vel. Þegar við vorum komin að afleggjaranum að Hjörleifshöfða, hitti ég Óla sem var loksins kominn á sitt hjól, en hann hafði keyrt niður eftir og hjólað upp að afleggjara. Það var mjög mikil stemning að hjóla niður eftir og þegar við komum að höfðanum þá bættust fleirir hjólarar í hópinn og það var stór hópur sem hjólaði niður á strönd. Það var erfitt að hjóla í sandinum eins og áður, þar sem ég spólaði svolítið í mjúka sandinum á of mjóum dekkjum.
Það var stórkostleg STUND að setja svo framhjólið í sjóinn, suðurstrandarmegin og hugsa til sunnudagsins fyrir rúmri vikusíðan, þegar við settum afturdekkið í sjóinn á norðurlandi. Algjörlega mögnuð stund og margir sem fengu gæsahúð og tár í hvarma á þessum tímapunkti.
Ég er einstaklega þakklát að hafa fengið að vera þátttakandi í þessu frábæra ferðalagi. Því það er ferðalagið allt frá A-Ö sem var algjörlega magnað og vel heppnað. Frábær félagsskapur, frábært skipulag, það gekk allt upp. Maturinn var góður alla dagana, aðstaðan fín og bara allir svo jákvæðir og skemmtilegir í þessum yndislega hóp. Ég var líka ótrúlega glöð að frábæra TREK SUPERFLY hjólið mitt stóð sig alla leið á þessu erfiða undirlagi, það bilaði aldrei og sprakk ekki einu sinni á því. AUðvitað þurfti maður að þrífa sand og smyrja keðju á hverjum degi því oft var erfitt að skipta á milli stóra og litla tannhjólsins að framan út af sandi og drullu. En wow hvað ég elska hjólið mitt. Ég var líka mjög ánægð með brynjuna sem ég fékk í afmælisgjöf og notaði allan tímann og fínu fjallahjólafötin sem Óli gaf mér í afmælisgjöf voru ofboðslega þægileg.
Takk kæru vinir sem skipulögðu ferðina, takk kæru leiðsögumenn, Leifur og Hilmar, takk allir Ísbirnir fyrir frábæra samveru allan tímann. Takk elsku Óli fyrir að koma með mér norður og vera með í byrjun og koma svo aftur og taka þátt í trússinu á suðurlandinu og fyrir alla aðstoðina við undirbúninginn.
Að þvera Ísland á fjallahjóli á 9 dögum, hjóla samtas 568 km með 6.250 metra hækkun, á 59 klst og 59 mín. sem eru rúmir 2 sólarhringar eða 2 sólarhringar og 11 klst og 50 mín.
Planið: 52 km, hækkun +900 m, lækkun -940 m
Rauntölur: 52 km – 1.071 m hækkun
Við Óli sváfum í North Face 4 árstíða tjaldinu okkar við Landamannahelli. Við notuðum þetta tjald í tveggja vikna ferðalaginu okkar í sumar í mjög góðu veðri uppá hvern einasta dag. Í nótt rigndi MJÖG MIKIÐ og því miður þá hélt tjaldið ekki vatni, það lak á nokkrum stöðun inn í það á saumunum. Við vorum því bæði að vakna við það að fá dropa í andlitið, svo við sváfum ekki mjög vel þessa nóttina. Fengum síðar upplýsingar hjá Leif að það er til efni sem á að bera á saumana, innanfrá á ytra tjaldið, sem við höfum aldrei gert. Leifur segir þetta tjald annars eitt besta tjald sem framleitt hefur verið.
Hefðbundin ræsing klukkan 08:00, morgunmatur og svo brottför klukkan 10:00. Borðaði hafragraut eins og venjulega, en mikið var gott að fá ferskt epli og bláber ofan á grautinn.
Eins og kom fram í pistli gærdagsins þá fóru Gísli og Leifur fóru með bílinn hans Gísla um 30 km af leiðinni í gærkvöldi fyrir matinn og gerðu könnunarleiðangur, hvora leiðina við ættum að fara. Niðurstaðan varð sú að fara Pokahryggsleiðina.
Við hjóluðum frá Landmannahelli til baka og um fjallveginn sem liggur um og yfir Pokahrygg, niður í Reykjadali og hálfhring í kringum Laufafell áður en við komum að Fjallabaksleið syðri þar sem við komum niður að Álftavatni og svo áfram alla leið inn í Hvanngil. Við fórum nokkrum sinnum yfir kvíslar Markarfljótsins og meðal annars hjóluðum eftir farvegi Laufalæks.
Leiðin er mjög krefjandi, það voru nokkrar mjög brattar brekkur, svo brattar að sterkustu hjólarar gátu ekki hjólað þær upp, þar sem þær voru bæði mjög brattar og undirlagið, þ.e. sandurinn mjúkur. Þegar búið var að fara yfir bröttustu brekkurnar þá fengum við verðlaunin sem var guðdómlegt útsýni yfir Reykjadalinn. Útsýni yfir Hrafntinnuskerið, þar sem við stoppuðum í nestispásu. Af mörgum stórglæsilegum nestis-stoppistöðum þá held ég að þetta hafi toppað öll önnur stopp. (Hér að neðan er smá saga um Pokahryggi),
Annar kostur við brattar og langar brekkur er að svo kemur niðurkafli og það var gaman að taka smá „downhill“ eftir nestisstoppið. Svo var ekki leiðinlegt að þvera Markarfljótið nokkrum sinnum. Í fyrsta skipti við upptökin, þ.e. við Hrafntinnuhraunið og svo nokkrum sinnum á leið okkar að Álftavatni.
Óli fór ekki alveg sömu leið á bílnum, þ.e. ekki upp þessa bröttu leið, en mér skilst að Pokahryggsleiðin sé oft farin af trússurum, sem eru að trússa fyrir göngufólk. Við hittum sem sagt Óla og aðra bílstjóra á barnum við Álftavatn, þar sem sumir fengu sér bjór en aðrir kaffi, áður en haldið var áfram að Hvanngili.
Það var mjög gaman að koma að Álftavatni, reyndar frá annarri leið, en hefðbundna „Laugavegsleiðin“ en eftir Álftavatn, fórum við leiðina sem ég þekki vel úr Laugavatnshlaupinu að Hvanngili.
Þegar við komum í Hvanngil þá aðstoðaði ég Sigrúnu við súpugerð og svo ferjuðum við súpupottana í Hesthúsið, þar sem Óli var búin að tjalda, tjaldinu okkar. Hittum Gunna Óla (Náttúruhlaupa leiðtoga) á tjaldstæðinu og Bryndísi systur hans og Sævar í Bændaferðum, en þau voru á sama tjaldstæði.
Á efri hæðinni í skálanum í Hvanngili voru hestamenn, sem voru á sömu leið og við daginn eftir. Systurnar Sara og Sólveig og þeirra fjölskyldur voru svo með kvöldmáltíð dagsins, hamborgara og meðlæti sem Óli hafði komið með úr bænum. Mjög góðir grillaðir borgarar og út af rigningu var gott að Óli og Óli Már voru með gasgrill, svo það einfaldaði grillun. Um kvöldið var svo dansað og sungið í risinu á hesthúsinu, enda „aðalkvöldið“ eins og reyndar öll kvöldin.
En það er alltaf stuð og gleði þar sem Ísbirnir koma saman og mikið sungið og dansað, enda útbúinn sérstakur Ísbjarnalisti á Spotify fyrir ferðina.
VI. Efnistaka á Hrafntinnuhrygg
Í júlí 1941 berst Kristjáni í Vogum pöntun á bílfarmi af hrafntinnu, sem hann skyldi afla á Hrafntinnuhrygg, sem liggur miðja vegu milli Kröflu og Jörundar. Þar sem Þ-11, hinn glænýi Ford-vörubíll, var bíla öflugastur í Mývatnssveit, þá réðumst við Hallgrímur Þórhallsson (1914-1982) bróðir Kristjáns til þessarar farar með honum. Þannig er Hrafntinnuhrygg lýst í Landið þitt Ísland: „Brattur fjallshryggur, 685 m.y.s. á Mývatnsöræfum austur og suðaustur af Kröflu. Efst í honum kemur fram gangur úr hrafntinnu, en hrafntinnumolar og brot finnast hvarvetna í grenndinni. Óvíða eða hvergi á landinu er eins fögur hrafntinna og hér. Hrafntinnuhryggur er að mestu leyti úr hrafntinnu og er talið að hann hafi orðið til við gos undir jökli.“ Pöntun þessi var frá byggingarmeistara á Akureyri og ætluð í húsbyggingu þar, áferð skyldi vera svipuð og á Þjóðleikhúsinu í Reykjavík. Þannig er hrafntinnu lýst í Íslensku alfræðiorðabókinni: „Hrafntinna, svart, glerkennt afbrigði af líparíti, stökkt og brotnar líkt og tinnusteinn, myndað við hraða kólnun hraunkviku, t.d. við gos undir jökli.“ Við höfðum meðferðis mikið af strigapokum og gengum nú upp eftir hryggnum og hófum að fylla pokana. Nokkra klukkutíma tók það okkur að ná fullfermi á bílinn, en ég fullyrði, að þetta er versta vinna, sem ég hefi nokkurn tíma stundað. Að ganga niður fjallshrygg með fullan poka af hrafntinnu, þar sem hver þynna skar sig inn í bakið á mér, þannig að ég hálfhljóp undan pokanum mest af leiðinni niður að bílnum. Loks var fullfermi komið á Þ-11 og við hugðumst leggja af stað heim að Vogum.
En þá kom babb í bátinn, bíllinn var orðinn svo þungur, að hann stóð fastur í sandinum: „Þetta er eins og ægisandur,“ man ég eftir að Hallgrímur mælti. Eigi man ég gerla, hvort við urðum að létta einhverjum pokum af bílnum og bera þá síðan á hann, þar sem fastara var undir, en alla vega komumst við í Voga undir kvöld og fór Kristján með farminn til Akureyrar daginn eftir. Örugglega prýðir hrafntinnan erfiða einhver hús á Akureyri ennþá, en hvaða hús? Glögga menn fyrir norðan bið ég nú að senda mér línu um þetta mál, þótt „aðeins“ 60 ár séu nú liðin frá þessum flutningum. Eggert Ólafsson og Bjarni Pálsson komu í Mývatnssveit árið 1752 og skoðuðu nágrenni sveitarinnar, einkum brennisteinsnámurnar og umhverfi Kröflu. Fyrst rannsökuðu þeir brennisteininn í Hlíðarnámum og fóru síðan á Hrafntinnuhrygg. Þeir segja að hrafntinnan sé í þremur lögum efst í hryggnum, og sé miðlagið best og um alin á þykkt (63 cm). Af hrafntinnunni sendu þeir tvö stykki til Kaupmannahafnar og vógu þau 103 og 93 pund (51,5 kg og 46,5 kg).
Sumir hafa talið, að hrafntinnan utan á Þjóðleikhúsinu sé úr Hrafntinnuhrygg á Mývatnsöræfum, en svo mun ekki vera. Húsið er pússað með blöndu úr kvartsi og hrafntinnu og mun hrafntinnan vera úr Hrafntinnuhrauni á Landmannaafrétt í Rangárvallasýslu. (Landið þitt Ísland, H-K, bls. 122-3.)
HEIMILD: https://www.mbl.is/greinasafn/grein/652842/
ÁÆTLAÐ: 80 km, hækkun +900 m, lækkun -785 m
RAUN: 80 km og 892 m hækkun
Skálinn í Versölum er í eigu 4×4 félagsins. Við vorum með allan skálann svo það sváfu allir inni, nema Milla, Tóti og Margrét, en það var samt alveg pláss fyrir þau inni. Skálinn er mjög stór og auðvelt fyrir alla að borða inni á sama tíma. Það var morgunmatur klukkan 08:00 og brottför klukkan 10:00, mjög hefðbundið.
Leiðin er um Sprengisand, er ágætlega þjappaður vegur en hins vegar minnir vegurinn mest á „þvottabretti“. Því er mjög erfitt að hjóla þennan veg og maður reynir að halda sér sem mest úti í kanti, en þá er sandurinn oft mjög mjúkur, sem er erfitt að hjóla, sérstakleg fyrir mig, þar sem ég var með mjórri dekk en flestir aðrir.
Ferðin gekk samt mjög vel og leiðin mjög falleg. Við hjóluðum fram hjá Þórisvatni. Á þeirri leið hittum við Óla minn og fleiri Ísbirni eða Húna sem voru að bætast í hópinn í dag, en Sóley Ólafs kom með Óla úr bænum. Fleiri bættust því í hjólahópinn á leiðinni. Tókum svo stutt stopp við Sigöldu virkjunina og svo aftur við Krókslónið, áin var mjög vatnsmikil þar sem við stoppuðum við mörkin inná Friðland að Fjallabaki.
Leifur fararstjóri er mjög sniðugur að skipta leiðinni upp, eins og í dag. Þegar um 45 km voru búnir sagði hann einmitt, næsta stopp eftir 10 km og svo aftur 10 km og svo síðustu 15-16 km eftir það. Svona skipulag virkaði mjög vel á mig. Eins og þegar 70 km dagurinn var, þá var planið að stoppa stutt á 7 km fresti, þ.e. þegar 10% var búið, svo 20% o.s.frv. það brýtur leiðina vel upp og styttir daginn og maður veit hvenær næsta stopp er, sem er mjög gott. Leifur er líka mikill reynslubolti.
Sandurinn inn á Friðlandi var aðeins erfiðari þar sem hann var oft aðeins mýkri.
Þegar við komum inn að Landmannahelli, þá tjölduðum við NorthFace tjaldinu okkar, það var reyndar ennþá mikil rigning og hafði rignt á okkur mikið allan daginn. Svo ég hjólaði bara í 66north Goretex jakkanum mínum. Það kom mér á óvart hversu gott var að hjóla í þessum jakka, en þar sem hann er úr Goretex þá andar hann mjög vel, mun betur en hefðbundnir hjólaregnjakkar.
Við, þ.e. ég, Bryndís og Jónsi áttum kvöldmatinn þetta kvöldið. Á matseðlinum var Dale Brie ostur með kexi, ólífum og vínberjum í forrétt. Svínahnakki, kartöflur og ferskt salat með bláberjum, jarðarberjum, fetaosti og hnetum í aðalrétt og Brownies, appolló lakkrís og rjómasúkkulaði í desert. Við vorum svo heppin að Óli var að vinna alla vikuna, svo hann fór bara með mér norður síðustu helgi í heimsóknina til Sjönu og Atla og fylgdist með okkur þegar við hófum ferðalagið. Svo kom hann aftur hingað þ.e. á suðurlandið og var með okkur, laugardag til mánudags. En það var mjög gaman að fá hann aftur í hópinn og frábært að fá nýjan og ferskan mat, bæði í grillveislu kvöldsins sem og bara nesti.
Fyrir kvöldmat fóru Gísli og Leifur með bílinn hans Gísla um 30 km hluta af leiðinni og tóku þá ákvörðun um hvaða leið ætti að fara daginn eftir. En það voru tveir möguleikar í boði.
Við Óli sváfum svo í tjaldinu um nóttina, en það rigndi mikið og tjaldið lak, þ.e. voru pollar inni þegar við fórum að sofa, svo ég get ekki sagt að ég hafi sofið vel þessa nóttina 🙂 🙂
PLANIÐ: 56 km, hækkun +370 m, lækkun -568 m
RAUN: 56 km og 653 m hækkun.
Veðurspáin „gul viðvörun“ gekk eftir. Fór í nótt á klósettið bara rétt rúmlega eitt og þá var frábært veður, falleg kvöldsólin og þó nokkuð myrkur. Hins vegar vaknaði ég oft við brjálað veður síðar um nóttina, mikið rok og rigning, kviður yfir 20 m.á sek.
Tommi var sá eini sem tjaldaði í Nýjadal í gærkvöldi, en um klukkan fimm í morgun flúði hann inn, þar sem súlurnar voru orðnar beyglaðar í tjaldinu og svefnpokinn og allt orðið gegnblautt. Þurfti svo að fara aftur á klósettið í morgun og það var varla stætt að ganga þessa nokkra metra niður í klósetthúsið.
Ákveðið var að hópurinn yrði að bíða af sér versta veðrið, fyrst átti að bíða til klukkan 13:00 sem frestaðist svo til klukkan 14:00. Leifur hvatti alla foreldra til að fara með börnin í trússbílum í Versali, þar sem þetta veður bauð ekki upp á hjólaferð fyrir börn.
Margir tóku ákvörðun strax um að fá far með trússbílunum, en ég tók ákvörðun að ég ætlaði að reyna að bíða veðrið af mér með hópnum, þar sem ég ætlaði mér alltaf að hjóla alla leið, ég var persónulega alveg tilbúin að bíða fram á kvöld eða nótt, til að geta samt klárað að hjóla dagleiðina 🙂
Klukkan 14.00 er ákveðið að láta reyna á þetta. Gunni „bróðir“ aðaltrússarinn kom inn og sagðist eiga eitt sæti laust, fyrir hjólara og hjól í bílnum. Það var ennþá brjálað rok úti og rigning og mér leist eiginlega ekki á þetta, er með mjög létt hjól og hrædd um að fjúka bara á hjólinu. Leifur sagði svo við hópinn að það yrði ekki beðið eftir neinum, hópurinn færi af stað og sá sem yrði síðastur yrði að taka þetta sæti hjá Gunna. Ég bauð mig því bara strax fram og ákvað að taka sætið. Guðrún og Sigga Bryndís tóku svo líka ákvörðun um að fara í bíl og það voru tvö laus sæti hjá Sigrúnu hans Hilmars, nema taka þurfti dekkin af hjólinu hennar Guðrúnar og setja í kerruna.
Hjólararnir lögðu svo af stað, þurftu að reiða hjólin, upp fyrsta hlutann, þar sem rokið var svo mikið. Við lögðum svo af stað á bílunum, eftir um 3 km leið þá sáum við hvar Gísli og Leifur voru úti í kanti og biðu eftir okkur. Ég fékk strax í magann, hélt það væri eitthvað að, en NEI, þá voru skilaboðin þau að við ættum að koma út úr bílnum, því veðrið væri ekki eins slæmt. VIð fórum því öll út úr bílunum, Sigga Bryndís og Stefán sonur hennar, Guðrún, Ísabella og ég og ákváðum að hjóla með Leif og Gísla. Það gekk mjög vel, var mikill meðvindur sem hjálpað verulega upp brekkurnar og stundum var reyndar smá hliðarvindur.
Sprengisandur er eins og nafnið bendir til mikill sandur og eini gallinn við hann var að vegurinn er eins og þvottabretti og því erfitt að hjóla hann. Mikið álag fyrir axlir og hendur. Ég er mjög ánægð með fulldempaða TREK Superfly hjólið mitt. En þegar ég fer upp brekkur, sérstaklega í sandinum þá festi ég demparana svo það fari minni orka í dempunina og þægilegra að fara upp brekkurnar þannig. Því er líka frábært að geta fest demparana á ferð. Eina sem ég hefði viljað vera með á hjólinu var „Dropper-Seatpost“ þ.e. að geta hækkað og lækkað sætið á ferð. Var að spá í að kaupa svoleiðis fyrir ferðina, en fannst það ansi dýrt. Reyndar voru nokkrir í hópnum að lenda í vandræðum með drop-seatpostinn þar sem mikill sandur festist inná milli og þurftu þá að festa bara sætispóstinn.
Við hittum hópinn sem hafði lagt af stað á undan okkur fljótlega, þar sem þau voru í nestispásu. Við tókum stutta nestispásu með þeim og ég var aldrei síðustu þennan daginn:-) Hugsaði alltaf til þess að ég hefði þá fengið sætið ha ha ha 🙂 Fengum góðar móttökur í Versölum þegar við komum þangað. Signe, Halldóra, Guðrún og Arnar voru með kvöldmatinn, mjög góða kjötsúpu, rúgbrauð og annað brauð. Góðan brie ost í forrétt og súkkulagði og lakkrís í eftirrétt. Allt mjög gott.
Við sváfum öll í skálunum að Versölum, ég var í dömu-herberginu með Signe og Dóru nöfnu minni. Um kvöldið fór Sigrún með okkur í mjög skemmtilegan leik, þar sem við vorum látin svara spurningum með tannstöngul á milli tannanna í munninum, einn fulltrúi úr hverri fjölskyldu tók þetta. Virkilega skemmtilegur leikur. Alltaf gleði og gaman með Ísbjörnum á ferðalagi.
Planið: 38 km, hækkun +280 m, lækkun -393 m
RAUN: 38 km, 366 m hækkun
Skálinn í Gæsavötnum, er einstaklega fallegur og umhverfið þarna guðdómlegt. Vatnið við skálann heitir Gæsavötn og það voru margir sem tjölduðu þar, enda frábært veður. Ég ákvað að sofa sjálf inn í skálanum, í efri koju á móti Signe og svaf mjög vel.
Vekjaraklukkan var stillt klukkan 08:00 eins og venjulega, morgunmatur og svo brotfför klukkan 10.00. Það var ofboðslega gott og falleg veður þegar við vöknuðum og margir sem borðuðu morgunmatinn úti.
Leiðin frá Gæsavötnum í Nýjadal er mjög falleg. Örvar á afmæli i dag, en hann er 17 ára. Ég að sjálfsögðu söng fyrir hann afmælissönginn í morgunsárið.
Svo var hópsöngur sunginn fyrir hann í fyrsta stoppi. Þar komst ég að því að nestið mitt var orðið frekar mengað af bensíni, allt sem hafði verið opið í kæliboxinu og glæra boxinu hafði smitast af bensíni og bragðið var ekki gott, Gummi staðfesti það. Sólveig reddaði mér strax flatköku með osti og harðsoðnu eggi, sem þau höfðu soðið um morguninn. Allir Ísbirnir eru alltaf boðnir og búnir að aðstoða og ég fann það alla tímann, þar til Óli kom með meiri mat til mín á degi sjö.
Dagurinn var ekki langur í km, en hann var mjög krefjandi yfirferðar, það voru líka mörg vöð sem við þurftum að hjóla eða vaða yfir. Ég var mjög bólgin á vinstra fæti (ofan á ristinni) eftir gædaginn, þar sem ég hafði dottið þrisvar á vinstri hliðina í öllum sandinum. Meiddi mig ekkert við byltuna, en fann verulega fyrir á ristinni þarna um morguninn, svona eins og þegar maður misstígur sig. Tók bara bólgueyðandi töflu og ákvað að fara ekki í vetrar-hjólaskónum mínum með klítunum, heldur að fara bara í KEEEN sandölunum mínum. Þeir eru með lokaðri tá og bandi yfir hælinn svo þeir hentuðu mjög vel. Byrjaði að fara í sokkum í þeim, en endaði svo bara að hjóla eða ganga yfir allar árnar berfætt. Það var alls ekki kalt, en auðvitað mikill sandur sem fór ofan í skóna, en alls ekkert óþægilegt.
Svo var afmælisstopp fyrir Örvar afmælisbarn í Tómasarhaga. Þar bauð Sigrún upp á nýbakaða kökur sem hún hafði bakað í skálanum um morguninn. Hjónabandssæla með bláberjum og þeyttan rjóma og að sjálfsögðu var líka boðið uppá heitt kaffi. Lúxuskerra Sigrúnar, klikkaði ekki þennan daginn frekar en alla hina. En Sigrún er einstaklega umhyggjusöm kona og húnarnir (Ísbjarnarbörnin) spurði okkur hvort hún væri svona Yfir Ísbjörn 🙂
Rétt áður en maður kemur að skálnum í Nýjadal þá var nokkuð stórt vað, sem ég náði samt að hjóla yfir. Einhverjir fengu samt byltu og urðu gegnblautir.
Við vorum með næstum allan gamla skálann í Nýjadal, en það voru útlendingar sem voru með 6 pláss á efri hæðinni.
Við fórum flest í sturtu í Nýjadal sem var líka algjörlega frábært að komast í sturtu og hrein föt.
Gísli, Sigga Bryndís og Stefán voru með kvöldmatinn í Nýjadal, grillað Lasagne ásamt grilluðum ostastöngum sem var virkilega góður matur. Fyrsta skipti sem ég smakka grillað Lasagne og ég get algjörlega mælt með því 🙂
Tóti, Milla og Margrét bættust í hópinn og við hittum skíðavini okkar, Boggu, Jón Kr, Axel og Siggu líka fyrir utan skálana í Nýjadal, sem var skemmtileg tilviljun.
Sigga og Gísli stýrðu svo skemmtilegum leik um kvöldið, þar sem við fórum í stígvélakast. Tommi hans Óla, náði yfirburða árangri, en þetta var mjög skemmtileg keppni. Ég var í liði með Tóta, sem alltaf skemmtilegt, þar sem hann hefur mikið keppnisskap og við kepptum til úrslita. Kristinn var nú okkar besti liðsmaður, en Tommi tók þetta alla leið, svo við fengum silfrið 🙂 🙂
Það var virkilega fallegt kvöld í Nýjadal í kvöld og manni fannst ótrúlegt að spáin gæti gengið eftir, þ.e. gul viðvörun, um nóttina og daginn eftir, mikil rigning og rok.
73 km, hækkun +806 m, lækkun -533 m
RAUN: 73 km og 911 m.hækkun
VIð pökkuðum tjöldunum og gengum frá í kerrurnar og lögðum af stað klukkan 10:00. Það var langur og krefjandi dagur framundan.
Það var áfram mjúkur sandur og svolítil hækkun í byrjun. Svo gekk mjög vel þar framundan. Eftir um 20 km þá fórum við yfir Urðarháls, sem er klárlega réttnefni, þar sem var bara urð og grjót. Svo kom mjög mjúkur sandur og ég datt þrisvar sinnum á vinstri hliðina, þar sem sandurinn var svo mjúkur og dekkin hjá mér mun mjórri en hjá öðrum. En ég var í pedalaskóm sem ég náði ekki að losa í tíma, þó ég hafi reynt að vera laus hægra megin, þá rann ég þannig að ég datt á hliðina alltaf vinstra megin, en sem betur fer mjúk lending í sandinum svo ég meiddi mig ekki neitt við bylturnar.
Eftir þennan erfiða kafla þá kom mjög grýttur kafli og eftir þessa erfiðu kafla var mjóbakið á mér orðið MJÖG SLÆMT, þannig að í hvert skipti sem ég stoppaði þá lagðist ég alveg útaf til að reyna að rétta úr bakinu.
Við fengum lúxus kaffi frá lúxuskerru Sigrúnar við skála þar sem margir komu aftur inní hópinn.
Á þessum tímapunkti vorum við búin með um 50 km af rúmlega 70. Svo kom mjög erfiður langur kafli, þar sem ég rétt náði að hanga í Guðrúnu og Ingu og ég fann að orkan var farin að þverra þegar við hjóluðum yfir síðasta hlutann af svona árfarvegi (eins og flæðurnar) á Gæsavatnaleið sem var mjög krefjandi leið að hjóla en ofboðslega falleg.
Það átti ekki að vera neitt vað, þennan daginn, en það var það mikið í ánum að við urðum að hjóla yfir, nokkrar djúpar sprænur. Á tíma var ég orðin það þreytt, að ég lét mig bara vaða, gangandi yfir ána og reiddi hjólið, því það tekur verulega í að reyna að hjóla í þessum mjúka moldar-drullu árfarvegi og ekki mikil orka eftir á tankinum. Hefði á þessum tímapunkti átt að taka inn orkugel. Borðaði bara nestið, smá súkkulaði og borðaði GU gúmmí, en reyndar fyllti alltaf brúsa af frábærum orkudrykk á hverjum morgni frá „UCAN“. Þegar horft er í baksýnisspegilinn hefði ég kannski átt að skipuleggja orkuinntöku dagsins betur, sérstaklega á svona löngum og/eða erfiðum dögum. Hefði t.d. átt að vera með duft í annan brúsa að UCAN orkunni, því hún er einstaklega góð.
Hilmar “tali-gæt” stoppaði okkur svo á hæsta punkti á hálendi Íslands 1100 metrum og við sungum og gerðum létt grín og nutum útsýnis yfir Tungnafellsjökul og Bárðarbungu.
Síðasti kaflinn var líka mjög krefjandi, það var mikil hækkun eftir og ég þurfti að nota hátalarinn og tónlistina til að koma mér bara alla leið í skálann, bakið var ekki gott, en mikið var gott að koma í skálann.
Þar var mjög gott veður, og margir sem gistu í tjaldi en samt margir inni, því þessi skáli er mjög notalegur, hlýr og heimilislegur.
Við Guðrún lentum í smá vandræðum með kæliboxin okkar, þar sem þær þoldu ekki hossinginn í kerrunni, svo rjómaosturinn hjá mér var komin út um allt box. Bryndís hjálpaði mér að fara út í vatn og þrífa kæliboxið.
Skálinn var eins og áður segir einstaklega flottur og við fengum ofboðslega gott, grillað lambalæri sem sem Þóra, Sigrún Hrönn og Sigrún Hallgríms sáu um. Það átti að bjóða uppá nýbakaða köku líka, en þar sem við komum svo seint, þá var ekki tími til þess og því var boðið uppá desertvín og súkkulaði sem var mjög gott.
Frábær en virkilega krefjandi leið og góður og fallegur dagur að kvöldi kominn.
Plan: 70km, hækkun +628 m, lækkun -270 m
RAUN: 67 km og 582 m hækkun
Gistum öll á hótelinu á Mývatni. Svaf reyndar ekki mjög vel þó ég væri á hóteli 🙂 Var alltaf að fara eitthvað að stússast fyrir svefninn, hlaða USB kubba, símann, úrið og nudd-byssuna.
Morgunmaturinn var ágætur, eins og vanalega var ræsting klukkan 08:00 og brottför klukkan 10:00.
Fyrstu 6 km voru á malbiki og svo kom moldarstígur þar sem við lentum í mý-snjókomu sem var rosalegt. Frekar fyndið og eftirminnilegt atvik, því ég segi við Sigrúnu, nei það er farið að rigna, svo sagði ég nei það er farið að snjóa og eftir smá stund fattaði ég að snjókoman var í formi MÝ, frekar ógeðslegt. Hafði ekki rænu á að sækja flugna netið fyrr en í stoppi númer tvö, en það munaði miklu og ég hjólaði með flugnanetið allan daginn 🙂
Við stoppuðum reglulega á leiðinni. Fyrstu 35 km voru mjög þægilegir. Svo komum við að Svartárbotnum, þar stoppuðum við hjá skála, þar sem Sigrún og trússarar heltu uppá kaffi og buðu uppá nýbakað rúgbrauði frá Húsavík með reyktum silungi. Þetta var ofboðslega falleg leið, en svolítið krefjandi.
Eftir hvíldina tók við ennþá meira krefjandi grjót-kafli um 8 km. Það var enginn stígur, Leifur þurfti að nota vörður til að ákveða hvar á grjótinu við ættum að hjóla. Þetta var svona eftir á, mjög góð fjallahjólaæfing 🙂
Eftir þennan kafla áttu að vera bara léttir 18 km, en það var drjúg hækkun og mikill og þungur sandur að hjóla í. En líka fín æfing í að hjóla í sandi 🙂
Þetta var oboðslega fallegur dagur, þar sem við hjóluðum úr fallegum gróðri í vinina og vorum komin næstum upp að jökli, þar sem skálinn í Dyngjufjalldal er staðsettur.
Við tjölduðum öll og sváfum öll úti í tjaldi á sandinum, þó við ættum 12 pláss í skálanum, en það komu 4 Danir sem notuðu sín 4 pláss.
Það var mjög gott að ég ákvað að tjalda því, það höfðu því miður opnast fjórir bjórar og helst aðeins yfir tjaldið, dýnuna og tjaldstólinn minn, en náði að þurrka það með Pampers tuskunum og svo var svo gott og fallegt veður um kvöldið að tjaldið þurrkaðist vel.
Inga og Jói buðu uppá Pasta Bolognese sem þau elduðu í stóru eldhústjaldi. Við vorum búin að borða þegar Danirnir komu svo við buðum þeim uppá kvöldmat. Þau báðu okkur um vatn og við létum þau hafa 10 l belg og þau kláruðu allt vatnið sem við létum þau hafa, þ.e. í uppvaskið. En þau voru bara með þurrmat og ekkert vatn, og á þessum stað, þ.e. í Dyngjufjalladal, er engin vatns-uppspretta, svo það var enginn möguleiki að sækja sér vatn og þau gangandi, svo þau voru heppin að hitta á okkur.
Við höfðum nefnilega tekið auka vatn á alla okkar brúsa í kaffistoppinu því við vissum að það væri ekkert vatn þarna og meirihlutann af morgundeginum.
Rétt fyrir svefninn var svo mikið hópefli þar sem gert var grín að því hvernig ég tjaldað í tjaldinu mínu í sandinum, en það var fínt hópefli fyrir hina 🙂 🙂
Gallery not found.
PLANIÐ: 42 km, hækkun +446 m, lækkun -522 m
RAUN: 61 km og 767 m hækkun.
Það var ræsing klukkan 08 og brottför klukkan 10. Ég svaf mjög vel í skálmum á Þeistareykjum, en ég svaf inni, þar sem það var nóg pláss og margir sem vildu frekar sofa úti í tjaldi. Það var ótrúlegur hávaði af virkjuninni, svo manni leið eins og maður væri staddur á flugvelli þegar maður fór út á klósettið eða kíkti út í tjöldin. Eins gott að vera með eyrnatappa ef maður ætlar að sofa í tjaldi við Þeistareyki.
Það var líka frekar kalt í morgunog mikill raki, þannig að tjöldin voru enn og aftur mjög blaut.
Ég fékk mér hafragraut (snilldargraut frá Costco, þar sem hver skammtur er sérpakkaður inn), með muslí, eplum og bláberjum og kaffi á fastandi maga, sem er nauðsynlegt eins og í hlaupunum til að reyna að klára númer 2 fyrir brottför 🙂
Við lögðum svo í hann klukkan rétt rúmlega 10. Við byrjuðum á þó nokkurri hækkun, og ég náði því miður ekki að hjóla upp alla brekkuna, en í gær hafði ég náð að hjóla upp allar brekkur, svo ég var frekar svekkt með það. Uppgötvaði síðar að ég var ekki á litla tannhjólinu að framan, svo það var góð ástæða fyrir því hversu erfitt þetta var 🙂 Svona er að vera ekki vaknaður ha ha ha.
Við hjóluðum að Litla Víti og gengum svo saman að Stóra Víti. En Stóra–Víti er gríðarstór sprengigígur um 300 m í þvermál. Gígurinn myndaðist við mikla gossprengingu við upphaf Mývatnselda árið 1724. Leifur leiðsögumaður er mjög duglegur að leiðsegja og deila með okkur fróðleik um náttúruna. Því miður var samt mikil þoka, svo við sáum ekki almennilega niður í gígana.
Stígurinn framan af var mjög góður, en svo tók við mjög erfiður og grýttur stígur eiginlega . Síðan hjóluðum við yfir hraun, sem myndaðist í Kröflu gosi árið 1984. Jónsi storkaði aðeins örlögunum með því að segja að það kæmi nú á óvart ef við kæmumst öll í gegnum þennan grýtt kafla án þess að það myndi springa, þá lenti Bryndís hans Jónsa því miður í því að sprengja hjá sér, en það var bara mjög hraður skiptitími eins og í F1 og ný slanga komin undir hjólið.
Við að sjálfsögðu fundum skjólsælan stað til að fá okkur nesti og svo aftur kaffi, en framan af var kalt, (samt alls ekki svo kalt þegar maður hjólar) frekar hitt, en góða við norðanáttina á þessari leið er að hún er í bakið. Svo fór sólin að skína og það er ekki hægt að kvarta yfir því 🙂
Eftir hraun kaflann, tók við nokkuð mjúkur moldarstígur en mjög ójafn og á þeim kafla urðu fjórar byltur, en sem betur fer enginn sem slasaðist alvarlega.
Við stoppuðum svo á veitingastað á Mývatni þar sem menn fengu sér að borða og bjór eða kaffi. Fékk mér flatkökur með hangikjöti og kaffi. Hjóluðum svo á Hótel Laxá þar sem við gistum, en það voru 18 km á malbikinu.
Hjóluðum því samtals 61,5 km með 867 metra hækkun.
Eftir að hafa skilað okkur á hótelið, þá skelltum við okkur í Jarðböðin á Mývatni og kíktum svo í Lopapeysubúðina Dyngjuna, þar sem við styrktum heimamenn.
Borðuðum svo þríréttaðan kvöldmat á Hótel Laxá, og svo vorum við bara komin inná herbergi klukkan 22:30.
Frábær dagur að kveldi kominn.
Plan: 32 km, hækkun +354 m, lækkun -24 m
RAUN: 47 km og 604 m hækkun
Þar sem við Óli gistum hjá Kristjönu og Atla að Sigurðarstöðum á Melrakkarsléttu þá hittum við ekki Ísbjarnarhópinn fyrr en í morgun klukkan 09:45 að Mánárbakka. Það rigndi mikið síðustu nótt, svo þau urðu að pakka tjöldunum blautum. En þau borðuðu víst frábæran grillaðan silung, a´la Hrönn g Jón Örvar í gærkvöldi. Skipulagið hjá skipuleggjendum (google excel skjalið) var algjör snilld, frá A-Ö. Til að mynda þá fékk hver fjölskylda (aðili) úthlutað einu kvöldi, þ.e. að sjá um kvöldmat eitt kvöld fyrir allan A hópinn, þ.e. þá sem voru með í ferðinni alla leiðina, en það voru 35 manns. Svo sá hver bara um sinni morgunmat og nesti yfir daginn.
En það var einstaklega gaman að hitta hópinn að Mánárbakka. Við Óli komum dótinu mínu (tjald, dýna og svefnpoki, NF Duffelbag, kælibox og matarkassi fyrir í kerrunni hjá Sigrúnu og Hilmari.
Þar sem markmiðið var að hjóla frá strönd til strandar, þá þurftum við að byrja við ströndina, þ.e. um 16 km frá Mánarbakka, þ.e. austar. Það voru langflestir sem hjóluðu frá Mánárbakka að byrjunarstaðnum, allt á malbiki.
Sem sagt formlegur byrjunarstaður var við ströndina þar sem við dýfðum afturhjólunum á hjólunum í sjóinn, þ.e. Við Öxarfjörð, sem var skrítin tilfinning, vitandi það að framundan voru 9 krefjandi dagar á fjallahjólum yfir hálendi Íslands. Sumir ætluðu að skiptast á að hjóla og keyra en það var 13 manna hópur sem stefndi á að hjóla alla leið, um 560 km með rúmlega 6.000 metra hækkun.
Hjólaleið dagsins var einstaklega, þ.e. frá Tjörnesi að Þeistareykjum, undirlagið var að mestu á mjúkum, moldarstíg í gegnum grófið og fallegt undirlendi.
Að sjálfsögðu var matarstopp og eitt kaffistopp á leiðinni. Í stoppum er mikilvægt að vera með hlýja úlpu í bakpokanum sem maður fer strax í, því ef maður er sveittur og stoppar þá er maður fljótur að kólna. Ég var alltaf með frábæra 66 norður prímaloft-úlpu/jakka sem fer lítið fyrir í hjólabakpokanum en er mjög hlý og þægileg að skella sér í. Var líka alltaf með sessu sem ég settist á, sem er líka betra, en að setjast á blauta og kalda jörðina.
Þessi dagur var einstaklega fallegur og veðrið var mun betra en við áttum von á. Ég lagði af stað í tveim peysum og regnjakka, en þurfti fljótlega að fara úr annarri peysunni og svo úr jakkanum líka. En hjólaði í þægilegu “brynjunni” sem ég fékk í afmælisgjöf, sem er algjör snilld. Öryggið í fyrirrúmi, þar sem mig langaði ekki að slasa mig aftur á hjóli.
Skálinn að Þeistareykjum er mjög flottur, en við vorum með allan skálann, sem er upphitaður og með alvöru klósetti.
Guðrún og Elli sú um kvöldmatinn, en þau grilluðu lambalærisneiðar og voru með mjög gott meðlæti. Algjör veislumáltíð. Þar sem það var nóg pláss í skálanum, þá kom ég mér bara fyrir í efri koju, sem var reyndar það mjó að ég var smá stressuð að ég mynd detta fram af, en gat sett svona barnaspítu fyrir 🙂
