Var búin að bóka okkur Óla í ferð með Haraldi og Fjallafélaginu á stálkanta gönguskíðum á Geitlandsjökul. Út af Covid-19 og hertum sóttvarnaraðgerðum þá ákvað Haraldur að hætta við ferðina. Við ákváðum hins vegar að fara með Helgu Maríu vinkonu sem er vanur jöklaleiðsögumaður og fórum bara tvö og tvö í bíl til að tryggja sóttvarnir.
Veðrið var algjörlega magnað og þetta var ógleymanlegur dagur. Það var samt mjög erfitt að renna sér niður á gönguskíðunum (með hælinn lausan) í þessum nýfallna snjó og eftir á hefðum við frekar viljað vera á fjallaskíðunum, það hefði verið algjörlega magnað í þessum frábæra snjó 🙂
En frábær ferð í frábærum félagsskap, þar sem allt öryggi, bæði línur sem og sóttvörnum var fylgt.
Hitti Helgu Maríu á Laugavegshlaupakynningu Náttúruhlaupa í 66 norður í Faxafeni mánudagskvöldið 15.júní. Ég sagði henni að það væri ágætis spá á Langjökli hvort við ættum ekki að skella okkur aðfararnótt 17. júní, fara svona Þjóðhátíðarskrúðgöngu á jöklinum, enda oftast betra færi og veður að nóttu til og núna bjart allan sólarhringinn. Helga María hafði nefnilega farið í lok aprtil með vinum sínum þessa leið, þ.e. þverað Langjökul frá vestri (frá Oki, Kaldadal, Geitlandsjökli til austurs , þ.e. að Skriðufelli og Kili. Helga María jafnhvatvís og ég var að sjálfsögðu til og úr varð að við fórum að redda okkur skutli upp eftir og til baka og Inga Björg vinkona ákvað að skella sér með okkur.
Við hittumst hjá Helgu Maríu klukkan 22:00 þriðjudagskvöldið 16. júní. Óli skutlaði mér þangað svo stelpurnar gátu sett í bílinn hjá honum, fatnað og slíkt sem þær vildu fá þegar við kæmum niður hinum megin.
Dagurinn hafði verið frekar töff, nóg að gera í vinnunni, hjólaæfing klukkan 6 um morguninn og hlaupaæfing 17:30, hvorugt sem ég gat sleppt 🙂 Ætlaði svo að reyna að leggja mig um kvöldið, en það fór að mestu í að pakka, og smyrja nesti, en náði samt alveg að hvíla lúna fætur í um 1 klst áður en við lögðum í hann.
Það var GUÐDÓMLEGA fallegt veður í Grafarholti þegar við hittumst og við vorum mjög spenntar. Bróðir Helgu skutlaði okkur uppeftir, en við fórum Kaldadal í gegnum Þingvelli. Kom á óvart hversu góður þessi vegur er orðinn og í raun skotfæri upp að Jökli þessa leiðina. Það var ennþá guðdómlegt veður þegar við komum að Jöklinum og(eftir skálann Jaka) klæddum okkur í gönguskóna og fatnaðinn og settum á okkur bakpokann. Bróðir Helgu tók af okkur mynd og kvaddi okkur og við tók ganga uppá Jökulinn. Hér að neðan sést hæðarprófíllinn og það er mesta hækkunin fyrstu 11 km sem taka ákveðinn tíma.
Við settum því strax skinnin undir skíðin og gengum upp á jökulinn. Við urðum að stoppa mjög oft á leiðinni, ekki vegna þess að við værum þreyttar eða uppgefnar, heldur vegna fegurðarinnar. Klukkan var orðinn rétt eftir miðnætti eða klukkan 00:40 og sólin að lækka sig verulega á lofti og litirnir voru guðdómlegir á himnum. Geitlandsjökull svo fallegur og útsýnið algjörlega magnað. Svo það var stoppað reglulega til að taka myndir og njóta augnabliksins.
Við fórum svo í línur þegar við vorum komnar á sprungusvæðið, þó það séu minni sprungur á uppleiðinni, heldur en niður hinum megin. Við höfðum samband við Hebba í Mountainers í gærkvöldi þegar við vorum að taka ákvörðun um að fara til að fá upplýsingar um snjóalög, færð og sprungur. Hann gaf mér súper góð ráð í gærkvöldi og svo heyrði Helga aftur í honum í dag. Frábær hjón þau Hebbi og Ólöf í Mountaineers, en þau eru með snjósleðaferðir bæði vestanmegin í Langjökli sem og austan megin og við Óli fórum 2017 og þveruðum einmitt jökulinn frá vestri til austurs á snjósleða, það þurfi að flytja sleðana yfir. Mæli 100% með sleðaferðunum þeirra.
En til baka í ferðalagið, ég var með mikið af nesti, flatkökur með hangikjöti, gróft brauð með spægipylsu og skonsur með feitum osti. VIð stoppuðum reglulega til að borða og drekka. En ég hafði blandað sjóðandi heitu vatni í Powerade og sett í NALGENE brúsann minn, svo það myndi ekki frjósa, en spáin gerði ráð fyrir 3-4 gráðum í mínus þessa nótt. Spáin gerði heldur ekki ráð fyrir að það yrði heiðskýrt alla nóttina, átti von á fallegum og heiðskírum morgni, en nóttin var öll algjörlega guðdómleg eða „breathtaking“ svo maður sletti. En við vorum komnar uppá hæsta punkt eftir um 2 klst og 20 mín ferð. Þegar við vorum komnar á hæsta punkt um 1.475 þá var útsýnið strax magnað. Horfðum á Kerlingafjöllin í fjarska sem og Bláfellið sem við fórum á fjallaskíði um daginn, Heklan og útsýnið og liturinn á himnum, magnþrungið.
Þá tók við mjög skemmtileg aflíðandi brekka niður, sem maður rann samt ágætlega, fórum reyndar aðeins út af tracki við það, en það gerði ekki til, því færðin var æðisleg og mjög gaman að geta látið sig renna eftir allt puðið upp brekkuna. Síðan tók við mjög langur sléttur kafli og undirlagið var mismunandi, gróft og slétt til skiptis en samt fín færð, ekki snjóbráð, ekki klaki og bara smá nýr snjór yfir öllu. Við hlustuðum á fallega tónlist, þar sem ég tók að sjálfsögðu JBL ferðahátalarann minn með mér og nutum næturinnar.
Það sem var svo skrítið var að ég var aldrei syfjuð, enda kom aldrei myrkur og fegurðin var svo mikil og við svo þakklátar fyrir að fá að vera þarna þrjár konur á Þjóðhátíðardegi um miðja nótt aleinar á jöklinum, magnþrungið. Ég bað Helgu reglulega að klípa mig í höndina, svo ég vissi að þetta væri raunveruleikinn en ekki draumur.
Endalausi kaflinn er samt svo fallegur og Helga var dugleg að minna okkur að horfa líka til baka á það sem við vorum búnar að skíða og horfa á falleg útsýnið sem var líka fyrir aftan okkur. Við stoppuðum á um 30 mín fresti til að drekka og borða og svo kom sólin upp. Aftur svo magnþrungið að horfa á það og reyna að taka myndir af svona mómentum, sem munu aldrei nást á mynd. Um leið og sólin var komin upp, varð mjög heitt og við fórum að fækka fötum. Ég hafði að sjálfsögðu tekið allt of mikið af fötum með mér, var með auka buxur, peysu, tvær húfur (auka), tvenna vettlinga (auka), auka sokka, primaloft úlpu, álpoka, neyðarskýli 2-3ja manna og svo allan matinn og drykki. Tók fullan Nalgene brúsa 800 ml og heitt kaffi í annan brúsa og svo með auka hálfan líter af Powerade. Svo vorum við auðvitað með belti og línur og auka línur og ísfestingar og að sjálfsögðu First-Aid kit. Auk allrar samlokanna, var ég að sjálfsögðu með fullt af súkkulaði og GU gelum og kubbum 🙂
Það fór að hlýna verulega og eins og ég sagði þá urðum við að fækka fötum, þá er gott að vera með öll þessi lög, en ég fór í allt of hlýjum Primaloft buxum yfir ullarbuxurnar og var í ullarbol, peysu og svo jakka og primaloft vesti ha ha ha 🙂 Ekki skrítið að manni varð heitt. En ég endaði á að fara úr primaloft buxunum og fara í vindbuxur yfir ullina og skíðaði síðustu 14 km á ullarhlírabol, sem er algjörlega magnað. Enda var blankalogn uppá jöklinum, sólin skein og færið var frábært.
Við fórum aftur í línu þegar við nálguðumst sprungusvæðið austan megin í jöklinum. Gleymdi að segja að miðið okkar, þ.e. stefnan var alltaf tekin á Kerlingafjöllin og hvað þau voru falleg. Við rétt sáum glitta í toppinn á Bláfelli, þar sem við vorum komin upp fyrir alla toppa, en sáum yfir á Hofsjökul og alla fjallasýnina. Gaman að hafa frábæra leiðsögumanninn og vinkonu mína Helgu Maríu með sem gat upplýst okkur um öll fjöllin og jöklana. Það sem var líka gaman var að sjá þessi fjöll sem ég er búin að vera að ganga á – á fjallaskíðum uppá síðkastið, þ.e. bæði Heklan og Bláfellið og mig langar mikið í Kerlingarfjöllin. Mæli 200% með Helgu Maríu sem leiðsögumanni, hún er snillingur og líka svo skemmtileg. Inga hafði líka farið í sprungubjörgun svo það var búið að setja á okkur ákveðin hlutverk ef Helga myndi falla niður, þar sem hún leiddi hópinn.
En eftir sprungusvæðið, losuðum við aftur línurnar og skíðuðum niður síðustu brekkuna. Hún var krefjandi en það kom mér á óvart hversu vel mér tókst að skíða (reyndar í plógi) niður brekkuna (ekki telemark). Það var aðeins kalt á höndunum að fara svona hratt niður, en hlýnaði strax þegar ég stoppaði og þurfti að fara að ganga aftur. Þegar við vorum komin að Jarlhettunum (guðdómleg sýn), þá tók við síðasta brekkan upp að skála Mountaineers í Skálpanesi sem er við brún Langjökuls austur af Jarlhettum. Óli gat ekki keyrt alla leið upp að skálanum svo við skíðuðum meðfram veginum niður að bílnum, þar sem við hittum Óla sem tók á móti okkur með heitu kaffi og möndlukökum.
Við skíðuðum samtals 43 km, með m 700 metra hækkun. Vorum 9 klst 32 mín á leiðinni, eða 6 klst og 22 mín sem moving tíma skv. Strava. Manni finnst ótrúlegt að stoppin hafi verið um 3 klst, en það tekur tíma að setja upp línur og taka niður, fá sér nesti og klæða sig í og úr fatnaði og taka úr og setja í bakpokann.
En það voru GLAÐAR, ÞAKKLÁTAR, FORRÉTTINDAKONUR, sem voru svo þakklátar fyrir að hafa getið látið þennan draum rætast að þvera Langjökul á einni nóttu og þessari stórkostlegu nóttu, þar sem samspil veðurs, fæðrar og frábærs félagsskapars gerðu þessa ferð algjörlega ógleymanlega.
Takk elsku Helga María fyrir að vera tilbúin að hoppa með mér og takk elsku Inga Björg að hafa drifið þig með okkur. Við vorum allar með þreytu í skrokknum, eftir ýmis ævintýri, skútuhlaupaferðir eða klifur á fjöll, en allar svo glaðar og þakklátar og enginn kvartaði undan þreytu, heldur var sælubros á okkur öllum eftir þessa mögnuðu lífsreynslu.
SMÁ TÖLFRÆÐI:
*Lögðum af stað klukkan 00:40 – 17. júní 2020
*Gengum 43,17 km
*Moving time: 6:22:02
*Heildartími 9:32:32
* Hækkun 670 metrar
* Hitastig 0°C – feels like -1°C
Langjökull hvílir á móbergshásléttu og virðist vera skiptur í tvö jökulhvel og hallar frá þeim báðum. Ýmis fell og fjöll eru í jökulröndinni. Á austurhliðinni eru Jarlhettur syðstar, tindóttur móbergshryggur. Norðar er Skriðufell við Hvítárvatn og Leggjabrjótur með Sólkötlu nokkru norðar og síðan tindar vestur af Hrútafelli og Þjófadölum. Má þar nefna Fjallkirkju (1.228 m) vestur af Hrútfelli og Hyrning (1.330 ), nokkru ofar í jöklinum. Austan við Fjallkirkju stendur eitt af sæluhúsum Jöklarannsókarfélagsins, reist 1979. Suðvestan og austan í hæstu bungu jökulsins eru tindarnir Þursaborg (1.290 m) og Péturshorn. Að norðanverðu rísa Jökulstallar upp frá jafnsléttu Fljótsdraga upp að jökulrönd en suðvestan þeirra eru eldvörp þau tvö (751 og 754 m) sem Hallmundarhraun er frá komið. Sunnar og vestar er Hafrafell en sunnan jökulsins Hagafell. Sérstakir hlutar hafa sín eiginnöfn svo sem Geitlandsjökull vestast, sunnan við hann er Þórisdalur er skilur Þórisdal frá Langjökli. Norðurhvelið hefur verið kallað Bald- eða Balljökull.
<script async src="https://cdn.embedly.com/widgets/platform.js" charset="UTF-8"></script>
Það var í lok fimmtudagsins 7. maí sem poppaði upp hjá mér á Facebook að Bláfjallaþríþrautin yrði haldin, sunnudaginn 10. maí og hámarksfjöldi væri 50 manns út af Covid-19. Ég smellti á skráningarlinkinn til að kanna hvort það væru ennþá laus sæti og sá að það voru tvö sæti eftir, númer 49 og 50. Ég hringdi strax í Margréti Magnúsdóttur þar sem ég var búin að lofa að vera hjólaþjálfari á sunnudeginum og fékk frí, sem var ekkert mál. Ég hringdi svo í Siggu Sig vinkonu sem var ekki við tölvu, en hún var til, svo ég skráði okkur báðar. Hún hafði tekið þátt í þessari keppni í fyrra, en þá var ég í útlöndum.
UNDIRBÚNINGUR
Við Sigga fórum seinnipartinn á laugardeginum upp í Bláfjöll til að kanna aðstæður á sporinu, þ.e. snjónum og veginum þ.e. hjólaleiðinni. Við skíðuðum lítinn hring og rennslið á „skinn“ skíðunum var bara fínt. Ég fór svo í grillpartý með Ísbirnum vinkonum mínum og Sigga hjólaði utanvegarkaflann á CX hjólinu um 11 km til Hafnarfjarðar til að kanna ástandið á veginum sem er lokaður bílaumferð. Vegurinn var grófur en samt þannig að það var alveg hægt að fara á CX hjóli.
KEPPNISMORGUN
Ég var búin að undirbúa mig vel hvað varðar allan búnað á laugardagskvöldinu. Fór snemma að sofa kvöldið áður og vaknaði klukkan 07:00 fékk mér hefðbundinn morgunmat fyrir keppni, þ.e. ristað brauð og kaffi á fastandi maga. Það er að ýmsu að hugsa í svona þríþraut. Taka þurfti til göngskíði (og velja hvaða skíði og þá hvort og hvað bera eigi undir þau) gönguskíðastafi, gönguskíðaskó, hjólaskó, hjólið, hjálminn, hlaupaskó og næringu. Þurfti að muna eftir að setja drykk í brúsa á hjólið og koma þurfti fyrir auka slöngu og gashylki í viðgerðartöskuna á hjólið. Við Óli lögðum af stað uppí Bláfjöll rétt rúmlega átta, fannst ágætt að vera einu sinni komin tímalega, til að stilla upp hjólinu og prófa aftur skíðin. Auk þessi þurfti að merkja bæði skíðin, stafina og hjólið. Fékk merki númer tvö. Hafði tekið þá ákvörðun að fara á skinn skíðunum, en ekki keppnis(klísturs) skíðunum þar sem það er vorfæri og því stundum vesen með áburð eða klístur á keppnisskíðin, þar sem ég kann ekki mikið á þetta klístur 🙂 Hins vegar er yfirleitt rennslið mun betra á keppnisskíðunum og ég því hraðari á þeim. En þetta var bara gleðikeppni og hugsað til að styrkja afreksskíðafólk í Ulli. Prófaði þarna aftur skinnskíðin og þau runnu ágætlega.
GÖNGUSKÍÐI 1/3
(10,5 km = 53 mín 58 sek = 11,4 km á klst meðalhraði – hámarkshraði 32,4 km/klst)
Við vorum ræst út í 8 manna hópum, klukkan 10:00 með u.þ.b. 1 mín millibili. Við Sigga vorum saman í þriðja ráshópi og ég skíðaði í sporinu á eftir henni. Við fórum vel af stað í þó nokkrum mótvindi. Svo fór að snjóa og þá snjóaði í sporið og þá fundum við hvað það var lítið rennsli í sporinu. Svo kom hríð og rennslið hjá Siggu var ennþá verra en hjá mér svo hún sagði mér að fara á undan sér. Ég fór fram úr henni og sagði henni að „drafta“ mig, þar sem það var ennþá mótvindur og ég vissi að hún myndi svo ná mér niður fyrstu brekkuna. Sigga er algjör snillingur niður brekkur, á meðan ég fer í plóg, enda er minningin um það þegar ég tvíhandleggsbrotnaði í Bláfjallagöngunni um árið, ennþá í fersku minni. Brautin lá um 5 km inn á heiðina og svo til baka. Þetta er ekki sami 10 km hringurinn og var í fyrra og við vorum því í engu skjóli af vestanáttinni sem barði á okkur.
HJÓL 2/3
(25,5 km = 1 klst 6 mín 54 sek = 22, 9 km á klst meðahlraði – hámarkshraði 68,9 km/klst)
Eftir að hafa skíðað yfir marklínuna, þ.e. tímatökumottuna, þá skilur maður skíðin og stafina eftir og hleypur í átt að hjólinu. Þar skiptir maður um skó, þ.e. fór úr skíðaskónum og í hjólaskóna, ég skipti um hanska líka (sem var ágætt þessir orðnir frekar sveittir), setti á mig hjálminn, hjólahanskana og svo HOKA bakpokann sem var með hlaupaskónum í. T1 = 2 mín og 27 sek. Henti mér svo á hjólið og náði góðri siglingu niður malbikaða kaflann að beygjunni, tók fram úr tveim keppendum á leiðinni að gatnamótunum. Náði hámarkshraða þar um 69 km á klst skv Garmin. Malarkaflinn var mjög krefjandi en ég fór samt fram úr öllum á fjallahjólum, þar sem CX TREK hjólið er auðvitað mun hraðara en fjallahjól almennt. Fór síðan fram úr tveim keppendum sem var sprungið hjá og hægði á mér og bauð þeim aðstoð. En það voru komnir aðrir keppendur að aðstoða þá báða svo þau sögðu mér bara að halda áfram. Þetta var mjög krefjandi 11 km grófur utanvegakafli, þar sem það eru almennt ekki demparar á CX hjólum og ekki á mínu, svo þetta tók vel á hendur og axlir, en vegurinn var samt skárri en ég hélt að hann væri m.v. lýsingar Siggu frá laugardeginum. Meðalhraði hjá mér var um 21-22 km á þessum erfiða kafla skv. Garmin Fenix 6x úrinu mínu.
Eftir malarkaflann tók við malbikskafli alveg niður að gatnamótum Krísuvíkurvegar og vegarins að Hvaleyrarvatni, eða við Dúfnakofana í Krísuvík. Þar beið okkar sendibíll þ.e. í T2 sem tók hjólið, hjálminn og bakpokan með hjólaskónum og ég henti mér í hlaupaskóna og hljóp af stað.
HLAUP 3/3
(5,43 km 31 mín og 32 sek. Meðalhraði 5:48 pace eða 10,3 km/klst og hámarkshraði 13,6 km /klst.)
T2 tíminn var 2 mín 7 sek, sem er frekar langur tími m.v. þríþraut, en þetta átti hvort eð er bara að vera skemmtikeppni, þ.e. taka þátt og hafa gaman sem ég og gerði. Hlaupið er utanvega í byrjun og fer svo í gegnum Vellina á malbiki og þaðan inn að Ástjörn þar sem er farinn hringur í kringum tjörnina allt á utanvega stígum.
Var því mjög glöð að vera á HOKA SPEEDGOAT utanvega skónum mínum, en ekki HOKA malbiks skónum. Mér leið ótrúlega vel í hlaupinu, en var auðvitað allt of mikið klædd. Í SWIX gönguskíða undirfatnaði, þykkum hlaupabuxum, legghlífum og í SWIX rúllukragabol og jakka og með buff 🙂 Þannig að ég batt utan um mig jakkann á hlaupunum og renndi niður kraganum á bolnum. Þegar ég var komin á malbiksstíg hinum megin við vatnið og tók beygjuna inná malbikaðan göngustíg, þá sé ég hvar ein stelpa kemur á milljón á eftir mér. Ég gaf því svolítið í og náðu góðum niðurhlaupskafla niður brekkuna, en svo þegar við vorum komin hringinn í kringum Ástjörnina, þ.e. rétt áður en við komum að Haukahúsinu, þá náði hún mér og var rétt á undan mér í mark. Við villtumst reyndar báðar í hraunkaflanum á milli Haukahússins og sundlaugarinnar, sem var bara skemmtilegt 🙂
LOKATÍMI = 2 klst 37 mín 2 sek skv. tímataka.net – 2 klst 36 mín 59 sek. skv. Garmin – næstum því á pari. Vegalengdin samtals: 41,29 km.
Þrátt fyrir að hafa misst Berglindi Gunnarsdóttur fram úr mér á lokasprettinum, þá náði ég 3 sæti kvk af öllum 24 konunum sem kláruðu keppnina. Var á eftir Karen Axelsdóttur, sem var í 2. sæti og Kristrúnu Guðnadóttur, gönguskíðadrottningu í Ulli sem var í 1 sæti.
Ég varð í 1 sæti í aldursflokki 50 ára og eldri og var í 12 sæti yfir alla keppendur af 40 sem kláruðu. Þessi niðurstaða kom mér skemmtilega á óvart, þar sem markmiðið var alltaf bara að fara og hafa gaman sem ég og gerði.
Óska ULLI til hamingju með glæsilega Bláfjallaþríþraut. Þakka öllum sjálfboðaliðum fyrir þeirra frábæra starf og hvatningu. Þetta var einstaklega skemmtileg keppni og gaman að taka þátt í henni og styrkja frábært starf Ullar í Bláfjöllum.
#HOKAONEONE #TREK #ÖRNINN #SPORTÍS #FISCHER #GARMIN #FENIX6X
