Það var ekki ljóst fyrr en um 10 leytið hvort við myndum sigla heim klukkan 13 eða 16, það færi eftir því hvort það væru farþegar að fara í dagsgöngu um Hornbjargið.
Við fórum því bara í tvær léttar gönguferðir eftir að hafa pakkað niður tjaldi og búnaði. Gengum fyrst upp að húsinu á Horni og fossinum og til baka.
Gengum svo alla strandlengjuna og sáum marglyttur sem höfðu skolast í land.
Siglingin heim var svo guðdómleg um 79 km löng þar sem við sigldum mjög fallega útsýnissiglingu.
Gengum frá Höfn í Hornvík út á Horn við Hornbjarg, þ.e. í gegnum Ystadal. Fórum þaðan uppá og yfir Miðfell (Miðdalur) og þaðan fór hluti hópsins uppá toppinn á Kálfatindum. Við fórum þetta allt undir frábærri leiðsögn Esterar refamömmu og heyrðum skemmtilegar sögur frá Hornströndum.
Að sjálfsögðu voru teknar reglulega nestispásur og fylgst með refunum og sáum líka yrðlinga. Frábært að ganga bara með léttan dagpoka, eftir að hafa gengið með þunga bakpoka síðustu tvo daga.
Guðdómlegt veður, frábær félagsskapur og magnað útsýni.
Gengjum samtals 23 km á 12 klst og 880 metra samanlögð hækkun.
Þegar við vöknuðum voru 5menningarnir sem gengu frá Fljótavík í Hornvík, komnir á staðinn, en þau höfðu gengið mjög krefjandi göngu deginum á undan. Þau lögðu af stað á laugardeginum og gengu Hlöðuvík, Aðalvík, Aðalvík-FLjótavík og svo Fljótavík-Hornvík.
Það var ótrúlega heitt alla nóttina þar sem sólin skein alla nóttina. En það var orðið aðeins skýjað um morguninn þegar við vöknuðum. Eftir morgunmat var tjaldinu pakkað og haldið áfram og lá leiðin til Hornvíkur þar sem við ætluðum að hitta restina af hópnum.
Þegar við komum kvöldið áður í Hlöðuvík, leist okkur ekkert á fjallið sem blasti við okkur, þ.e. gönguleiðin á degi 2. Hins vegar þegar við vorum lögð af stað og komin uppá fjallið þá var það mun einfaldara að klífa en það leit út í upphafi. Leiðin var mjög falleg yfir Atlaskarð og við hittum leiðsögumann frá FÍ á leiðinni, sem var að snúa við í skálann í Hlöðuvík.
Við gengum samtals 11 km með 529 metra hækkun. Tíminn var 5 klst og 20 mín.
Þegar við komum að Hornvík (Höfn) þá var ég ekki viss um hvort við ættum að hitta hópinn þar eða útí Horni þar sem eru tvö hús. Fann ekkert um það í tölvupóst samskiptum. Kíktum því í bragga-tjald sem var þarna við ströndina og þar var merkið BOREA ADVENTURES og hvað við vorum glöð að þurfa ekki að ganga með bakpokana alla leið út í Höfn 🙂
Fengum frábærar móttökur frá starfsmönnum Borea þar sem okkur var boðið uppá kaffi og súkkulaðikex. Eftir að hafa tjaldað, þá velti ég fyrir mér að ganga á móti hópnum sem var að koma úr Veiðileysufirði, en Ester hafði farið á móti þeim, áður en við komum. Svo bara kom hópurinn, léttur og glaður og það var gaman að hitta þau öll.
Ég var svo farin að hafa áhyggjur af 5menningunum sem höfðu lagt af stað frá Hlöðuvík á eftir okkur, svo ég ákvað að fara á móti þeim. Hitti þau eftir um 1 km göngu þar sem þau voru að fara upp og niður kaðal smá skarð sem þurfti að klífa, svo það var ágætt að geta aðstoðað þau og gaman að hitta þau aftur.
Fengum svo frábæran pastakvöldmat hjá Borea og ostaköku í desert, yndislegt kvöld.
Við sigldum með Sjóferðum Hafsteins og Kiddýjar og Hafsteinn var skiptstjórinn í ferðinni, ásamt Stíg. Við sigldum frá Ísafirði klukkan 09:00. Um borð voru nokkrir farþegar ásamt tveim Kayökum.
Við fengum 3 klst útsýnistúr, þar sem við sigldum alla Jökulfirðina. Fyrsta stopp var í Grunnavík, annað stopp í botni á Hrafnsfirði, þriðja stopp við Drápsvík og svo átti að fara á Hesteyri, en þá kom neyðarkall frá Landhelgisgæslunni um vélavana bát, þar sem sækja þurfti farþega. Svo snúið var við áleiðis til Bolungarvíkur og farþegar teknir um borð. Eftir það var hægt að sigla til Hesteyrar og við komum þangað um klukkan 12:00.
Veðrið var einstaklega gott, sól og blíða og blankalogn og hiti. Við byrjuðum á að fá okkur kaffi og skoða Læknishúsið á Hesteyri (þekkt úr bókinni Ég man þig, eftir Yrsu) og fylltum á vatnsbrúsa. Lögðum svo af stað um klukkan 13.00 frá Læknishúsinu.
Það var mikill snjór á leiðinni en mjög fámennt af fólki. Vorum yfirleitt bara tvö á allri leiðinni. Við stoppuðum reglulega til að taka af okkur bakpokana, en við vorum með um 15 og 20 kg bakpoka á bakinu, þ.e. almennilegt tjald, dýnur, svefnpoka, auka fatnað, mat og drykki.
Ganga frá Hesteyri til Hlöðuvíkur var um 15 km löng, 560 metra hækkun, og heildargöngutími 6 klst og 40 mín. Þessi fyrsti dagur var alveg krefjandi, enda þarf að venjast því að ganga með svona þungan bakpoka, en leiðin var virkilega falleg.
Tjölduðum svo í Hlöðuvík og kvöldið var gjörsamlega guðdómlegt að horfa á sólina setjast á sjóinn, var algjörlega magnað.
Laugavegshlaupið er 55 km utanvegahlaup en Laugavegurinn tengir saman Landmannalaugar og Þórsmörk á sunnanverðu hálendi Íslands, tvær sannkallaðar náttúruperlur. Göngugarpar eru venjulega 4 daga á leið sinni um Laugaveginn en hröðustu hlaupararnir fara leiðina á 4-5 klukkustundum.
Laugavegurinn kallast gönguleiðin milli Landmannalauga og Þórsmerkur. Er hún um 54 km löng og fer hæst í um 1050 m.y.s. við Hrafntinnusker. Leiðin er afar vinsæl meðal innlendra sem erlendra göngumanna enda þykir hún ægifögur og bjóða upp á brot af flestu því sem íslensk náttúra hefur upp á að bjóða.
Áfangar á gönguleiðinni eru látnir ráðast af skálum sem á henni er. Ef gengið er frá Landmannalaugum eins og algengast er verður fyrst á vegi manna skálinn í Hrafntinnuskeri, svo Álftavatni, Hvanngili og Emstrum (Botnum), en allir skálarnir eru í eigu Ferðafélags Íslands. Endar gönguleiðin í Þórsmörk þar sem gengið er í Húsadal, Langadal eða Bása (í Goðalandi). Algengast er að skipta leiðinni upp í 3-4 dagleiðir þó svo það sé stundað að hlaupa leiðina á allt frá fimm klukkustundum.
Gönguleiðin milli Landamannalauga og Hrafntinnuskers eru 12 km. Áætlaður göngutími er 4-5 klukkustundir. Hækkunin er mest á þessum kafla leiðarinnar eða 470 metrar. Oftast er þetta fyrsta dagleiðin en sumir leggja snemma af stað og ganga alla leið inn að Álftavatni. Vegalengdin milli Hrafntinnuskers og Álftavatns eru einnig 12 km og er lóðrétt hækkun 490 metrar. Þessi hækkun er jafnari en á fyrsta degi. Áætlaður göngutími er 4-5 klst. Þriðja göguleiðin er inn í Emstrur. Þangað er 15 km ganga og lítil hækkun, 40 m. Göngutíminn er 6-7 klukkustundir. Síðasti dagurinn fer svo í að ganga inn í Þórsmörk og er vegalengdin og áætlaður göngutími sá sami og á þriðja degi. Hækkunin er þó meiri eða 300m.
Fyrsta ferðin sem skráð var á vegum Ferðafélags Íslands á Laugaveginum var 30. september 1978. Árið 1979 var í fyrsta sinn sem Ferðafélag Íslands auglýsti fjögurra daga ferð um Laugaveginn og Þórsmörk og var sú ferð farin 13.-18. júlí 1979. Eftir það hefur fjöldinn allur af fólki og ferðamönnum farið Laugaveginn á vegum Ferðafélags Íslands.
Hér að neðan er að finna myndir af þessari gullfallegu leið sem var tekin í hlaupinu 13. júlí 2019.
Toppaði Snæfellsjökul á fjallaskíðum í kvöld í mögnuðu veðri. Fórum á stuttermabolnum alla leið upp, eða þar til skugginn af Þúfunni skall á okkur. Fór með Guðmundi Smára og Guðmundi Tryggva, en Siggi Kiernan ætlaði með okkur, en var orðinn lasinn svo hann missti af þessari frábæru ferð.
Við ókum úr bænum eftir vinnu klukkan 17:10. Lögðum í hann upp jökulinn fyrir klukkan 20:00. Ferðin upp á topp á skíðunum tók rétt innan við 2 klst. Fórum meðfram jaðrinum, leiðina sem snjótroðarnir fara, þá fengum við sólargeislana í andlitið allan tímann, í stað þess að taka skuggaleiðina beint upp, sem ég hef reyndar farið tvisvar áður.
Var svolítið lengi að koma mér af stað frá bílastæðinu út af tveimur ástæðum. Í fyrsta lagi fann ég enga hárteygju, og eyddi miklum tíma í að leita eða finna mér hárteygju, enduðum á að klippa til snæri, sem rann svo reyndar strax úr hárinu á mér. Svo var ég að læra á bindingarnar á skíðunum, því Siggi lánaði mér frábæru léttu fjallaskíðin sín og skóna, þar sem ég er nýbúin að selja mín skíði og ekki búin að fá mér ný. Ekki viss um að Siggi fái skóna og skíðin til baka, þar sem ég tók algjöru ástfóstri við græjunar hans 🙂 😉
Það var algjörlega magnað að komast á toppinn og sjá magnaða útsýnið yfir fallega landið okkar og út á haf. Síðan fórum við af skíðunum og gengum upp á þúfuna, snjórinn var mjög mjúkur og á tíma fann ég fyrir smá lofthræðslu, enda hafði ég skilið broddana mína eftir niður í bíl. Út af sólinni og hitanum, var smá snjóbráð og það var að renna snjór og leka niður af þúfunni og smá snjóflóðahætta þar í kring, svo við fórum ekki alveg uppá brattasta topp, enda ekki í línu og ekki með brodda, þó við vorum með beltið og kaðalinn í bakpokanum á okkur, en við vorum með hjálm og ísexi.
Á leiðinni niður varð ég svo að stoppa til að taka magnað mynd, þar sem skugginn af Snæfellsjökli myndaði skemmtilegan skugga út á hafið. Magnþrungið útsýni. Færðin var æðisleg niður og meiriháttar gaman að skíða.
Þegar við komum svo niður uppgötvaði ég að ég var með þessa fínu „Alparósar-hárteygju“ á Deuter bakpokanum mínum, sem ég hefði auðvitað átt að nota 🙂 Mun aldrei gleyma því aftur, en þessar fallegu blómateygjur eru á öllum kvk bakpokunum mínum frá Deuter.
Snæfellsjökull toppaður 22.05.2019, var maí verkefnið mitt, þar sem ég verð 50 ára 20.júní næstkomandi og markmiðið að gera eitthvað „spennandi“ í hverjum mánuði allt almanaksárið. Takk kæru vinir Guðmundur Smári og Guðmundur Tryggvi fyrir frábæra ferð og takk Siggi fyrir lánið á búnaðinum.
Ert þú búin að setja þér markmið fyrir 2020?
Ef þú vilt gera eitthvað „EINSTAKT“ og hefur gaman af fjallgöngum og hlaupum, þá er hérna tækifærið. Við ætlum að taka þátt í Everest maraþoninu, 29. maí 2020.
Everest Maraþon ferðin er samstarfsverkefni Náttúruhlaupa (Arctic Running) og Íslenskra Fjallaleiðsögumanna.
Þetta er 20 daga „einu sinni á ævinni“ ferð og farið verður af stað frá Íslandi 15. maí 2020.
Tenzing Hillary Everest Maraþonið er alþjóðlegur íþróttaviðburður þar sem hlaupið er úr Grunnbúðum Everst, 42 km leið niður í Namche Bazaar, höfuðstað Sjerpana.
Boðið verður upp á 60 km ultra maraþon, 42 km maraþon og 21 km hálfmaraþon. Í ferðinni er gert ráð fyrir góðum tíma til þess að aðlagast hæðinni þegar gengið verður upp í grunnbúðirnar fyrir hlaupið.
Smelltu á linkinn til að fá frekari upplýsingar og skrá þig:
Tók að mér að skipuleggja Nýársgöngu á Esjuna á nýársdag í fjarveru Trausta Valdimarssonar. Það voru 47 hressir göngu/hlaupagarpar sem mættu ásamt 3 hundum.
Stefán Bragi og Iðunn, komu með prímus og buðu uppá heitt kakó og kleinur og ég mætti með Nóa konfekt og áramótatónlistina.
Virkilega yndisleg og góð byrjun á nýju ári.
